阿拉小个辰光，住辣一条邪气嘈杂个弄堂里，弄堂里向侪是高高低低个木板房，住辣里向个大多数是做小生意或者附近工厂个工人。迭辰光虽然已经有了电灯，但用得上个呒没几家人家。勿单单是因为电灯比起蜡烛、煤油灯开销大，还因为用电灯有交关多个麻烦。

　　迭个辰光上海刚刚解放，大家个生活水平勿高，摆得上台面个家用电器就是电灯，收音机更加勿谈，就只有弄堂里向开烟纸店个老板屋里有。讲起电灯，大多数人家就一只灯头，为了省电，一般侪是辣屋里个隔墙顶高头凿只洞，灯泡就吊辣洞里向，里向外头侪有点光。有楼浪个人家，就辣地板浪挖只洞，让楼下头个电灯光透一眼到楼浪向。因为家家人家用电省，每个月用电量勿多，整条弄堂几十家人家就合用一只电表。但是房子有大有小，人口有多有少，灯头有个人家多，有个人家少，灯泡也是有大有小，每家人家个电费是按照灯头多少，灯泡大小来算个，葛咾每个月收电费是一桩邪气吃力复杂个事体。当时个灯泡质量勿大好，常常要坏，一坏就要调。后来发觉每个月收上来个电费跟电力公司要收个差距越来越大，平摊到每家人家费用当然也越来越多，乃末意见就多了。居委会就组织有关人员一家家排查，寻找原因，原来是有些人家灯泡坏脱以后，勿打声招呼就自说自话拿原来个小灯泡换成大灯泡，还有更加肮三个是，个别人家白天勿开灯是小灯泡，到仔夜里开灯个辰光调成大灯泡，但是电费还是按照原来登记个小灯泡算，少收电费个漏洞总算寻着哉。为了避免再出现迭种弄虚作假个情况，规定凡用电灯个人家，侪要辣灯头跟灯泡连接个地方贴一张由居委会盖章个封条，灯泡勿允许随便调，假使坏脱，一定要辣居委会有关人员个监督下调，调好以后重新贴上封条。

　　电灯虽然亮，而且清爽安全，但按照当时家庭个经济情况，多数人家只有一只灯头，灯泡一般也就是十五支光，个别人家最大也只有二十五支光。由于规定电灯只能固定辣一个地方，勿好随意移动，加上调只灯泡又介麻烦，所以有些人家还是觉着点蜡烛或煤油灯省事体。我记得住辣阿拉对门个山东大娘，有天老家来了亲戚，天黑个辰光，伊神气活现个开亮电灯，让乡下个亲戚羡慕得勿得了。啥人晓得夜饭吃到一半，灯泡突然坏脱，屋里向墨漆乌黑，伊一双小脚来来回回寻居委干部，寻遍弄堂勿见人影子，原来迭位里委干部有事体出门还呒没回来，其他人又勿肯担肩胛，无奈之下，伊只好重新点起煤油灯救急。

　　不过，迭段辰光勿长，后来大家个经济条件好了，勿仅家家用上了电灯，而且收音机也逐步普及，用电量与日俱增，合用电表个范围也小仔交关，大家勿再为电费分摊斤斤计较，贴辣电灯跟灯头浪向个封条也终于扯脱了。搿种事体辣今朝看来有点勿可思议，但确确实实发生过。