上世纪九十年代，电信发展一下子快了起来，私人电话开放，主要马路人行道都置起电话亭。之前上海市内通信长期靠基本全覆盖个公用传呼电话承担，打长途则要跑到邮电局去解决，既麻烦还费用大；埃个辰光，邮政电信还呒没分家，老百姓勿到万勿得已，是勿会去打长途个，突出个例子就是老三届知青辣外地插队务农，逢年过节勿能回上海团聚，多数是搭屋里向写封信邮寄问候，直到十年后返城，大部分一只长途电话也呒没打过、碰过。改革开放后，大批农民工入城打工，伊拉总算可以方便个用电话搭家人联系，搿是托时代进步个福。进步个速度而且老快，当年迭些电话亭出现个同时，无线移动通信也已向普通老百姓靠近。现在，搿眼电话亭还辣拉街头，但落阵头雨让路人躲雨大约已超过了通信个功能。种楠 摄 林庸 文