有人讲，老早读书人中了状元，就做大官，侪是贪官，侪呒没学问。我勿赞成搿种一刀切个讲法，中了状元，勿当贪官而有学问个人，也是有个。明代绍兴状元张元忭（忭，读便），就是一位。《明史》上有伊个传记。

　　迭格张元忭祖上做大官，张浚做过宋朝丞相，伊个老爸张天复做到太仆寺卿，是个三品官。张元忭20岁考中举人。之后呒没多少辰光，伊老爸吃了一场冤枉官司，张元忭一直为父亲鸣冤叫屈，到处奔走，父亲释放时，张元忭30岁，已满头白发，成了“少白头”。伊勿靠老子个权势，33岁中了状元。伊迭个人，生性耿直，虽然是丞相张居正个门生，满朝文武侪去拍张居正马屁，但张状元勿跟着趋附。但自家姆妈生毛病时，伊辞去为天子当讲官个职务，回绍兴伺奉姆妈，亲自煎汤熬药，每一口汤药侪要自家亲口尝过，再拨姆妈服用，受到乡亲们个称赞。

　　伊中了状元，当上翰林院编修，地位相当于今朝个院士，不过生活仍旧十分简朴，每天只吃两菜一汤，穿布衣，伊个妻子为了贴补家用，每天亲自编织网巾，到贸易市场浪出售，百姓都说搿是“状元夫人所织”网巾，纷纷争购，但价钿并勿上涨。靠编织网巾，赚勿了几个铜钿，屋里日脚还是过得紧绷绷个。 

　　张元忭迭个状元有真学问。伊写过一篇题目叫《遗子说》个文章，人家勿大晓得。搿搭顺便介绍几句。迭篇文章就为儿子遗留点啥遗产个问题，搭来客展开辩论。客人说，我要多买点田地住宅留拨儿子。张元忭勿赞成。张元忭辣文章中写道，我个先祖呒没留下丰厚个田宅家产，只不过“薄田敝谝”而已，搿个反而激励我搭父亲勿断创业个志气。张元忭严厉批评替子孙买大量田宅家产个来客，认为搿实在是一大过失：“噫！子过矣，子过矣！子亦安可逆料汝之子不贤且智，如若父与子之能自创立也，而汲汲焉为之谋耶？若子广田宅以遗若子，而逆待之以不肖，遗之虽厚，待之实薄矣。” 

　　一连用两个“子过矣”，看得出来，张元忭气愤得很。搿就是讲，广有田宅、留下大笔遗产拨儿子，大错特错了。搿能做，容易让伊拉滋生依赖心理，假如儿子有出息，就勿必煞费苦心为伊留房产；假如儿子勿争气，即使留了交关房子搭钞票拨伊，伊还是守勿住。靠祖上遗产过日脚个儿子，即使守住了，充其量不过是一条寄生虫罢了。遗留个东西看上去蛮厚实，其实是害了伊拉。 

　　张元忭同时宣称“我则以贤且智待吾子”。伊对子女教育学习非常严格。“贤”是德行，“智”是才智。德行才智比房产黄金更有用。迭个遗产，比无知者个房产更值铜钿。伊要求两个儿子刻苦学习，每日夜里侪要燃香点烛勤奋苦读，勿到半夜勿许睏觉。辣拉伊个严厉监督搭悉心指导下，两子儿子都中了进士，孙子耀芳官做到鲁献王长史，曾孙张岱是明末著名个文学家和历史学家，比曾祖父还要有名气。 张元忭还做过一件好事，想方设法救了明代著名书画家徐文长一命。徐文长有才气，是一个怪人，因为胡宗宪一桩案子受牵连，被投入监狱，伊想勿通，假装癫狂，竟用一把锥子刺自家个耳朵，深入几寸，差点戳到脑子，还用椎子砸烂自家个阴囊，但都呒没死脱。后来，自家写了《墓志铭》，三次自杀，被判死罪。张元忭听说后想了许多办法，写信拨垃上头说，迭个人人才难得，几百年出一个。经张竭力挽救，万历元年，徐文长出狱，已53岁。张元忭辣50岁迭年去世，徐文长身穿白衣去吊唁，拍着棺材大哭，哭了几十分钟，哭得死去活来，也勿告诉主人家自家姓甚名谁，就悄悄离开了。怪？