文 / 薛理勇

　　福州路老底子也叫“四马路”，是上海“十里洋场”当中好白相个场化，凡是到上海来白相个外地人、外国人侪会到“四马路”去白相。早来拉1885年，有几个外国人租了“四马路”三开间个门面开了一家店，店里勿卖物事，就来拉厅堂当中挂了一块布帘子，当中嵌了一个人头，讲啥迭个是从外国深山里捉来个野人个骷郎头，侬朝伊望，伊也会用眼睛朝侬眨发眨发，嘴巴张发张发，引得上海人去看闹猛，只要付三分洋钿买张门票，就可以看到外国来个“野人头”。

　　辰光长了，交关门槛精个人就看出了门道，迭只“野人头”实际上是外国人做个一只人头模型，嘴巴、眼睛是活络个，后面用线牵牢，活脱势像一只放大个“牵线木头人”。外国人拿仔牵线木头人来骗中国人个消息就传开了，惹得交关上海人光了火，准备集合起来交外国人讲张，上伊拉个腔，几个外国人得到迭个消息后，豪燥连夜逃脱了。不过，上海滩浪向倒是留下了迭能一句闲话，叫做“卖野人头”。

　　来拉上海闲话当中，“卖野人头”就是虚张声势，夸大事实来欺骗别人个意思。

　　【沪语解释】

　　侪：都           骷郎头：头颅 

　　物事：东西       讲张：讲话、谈论

　　迭个：这个       迭能：这么

　　门槛：窍门、门道。门槛精：很精明

　　牵线木头人：提线木偶，沪语喻被人控制、操纵的傀儡。

　　活脱势像：真的那样像。