下面搿两只小故事当中包含十二个带数字个沪语成语，答题者拿伊变成小故事，蛮灵个。

　　外婆家 

　　■ 答题人/常德路老读者杨保飞

　　小辰光，我到乡下头外婆家过暑假，当年个场景侪印辣拉我个脑子里，一生一世也勿会得忘记脱个。 记得我搭我个表哥走仔好几里七高八低个烂泥路，到山浪向去采野花、捉（shejik蟋蟀），一勿留心，我从山坡浪滚下去，跌得我七荤八素，推扳一眼眼杠头开花…… 

　　记得看仔电影《红楼梦》后，我搭表妹从舅妈个大橱里翻出绸缎被面子披辣拉身浪向，一搭一档 扮宝哥哥搭仔林妹妹，样子有眼七勿老三个，阿拉两家头倒是白相得来老老扎劲个。记得舅妈下班回来，看到屋里向迭副卖相，真个哭笑勿得，伊板起面孔教训阿拉：“喂，勿要搿能搞七廿三好？”又低声咕仔一句：“讨债鬼，乃末我十日八夜也收作勿清爽哉！” 我还记得毛手毛脚、投五投六个我，勿当心拿舅妈房间里个一只花瓶敲碎脱了，还瞎三话四讲啥是花瓶自家掼下来个，舅妈呒没怪我，叫我要做一个诚实个小囡。阿拉娘舅做事体老爽气个，伊讲起闲话来也是一刮两响，阿拉大家侪欢喜伊，搿日子娘舅教阿拉写毛笔字，我头一趟拿毛笔写字，手抖豁豁个，字写得来七歪八牵，就像蟹爬个能介。 记得开学快了，我要回上海了，舅妈开开心心个烧仔一台子个小菜，三等四样，色香味齐全，统统侪是我顶顶欢喜吃个。眼睛一眨，几十年过去了，外婆家留拨我个美好记忆好像就辣辣眼门前一样，清清爽爽。 

　　赤脚财神阿德哥

　　■ 答题者/虞放

　　从前有个宁波阿德哥，伊真名实姓叫虞洽卿。有关于伊赤脚财神个绰号，真真假假虚虚实实个传说，笃定搞得侬“七荤八素”，伊个故事就是“十日八夜”也讲勿光。虞洽卿“一生一世”经商做生意，曾经与蒋介石“一搭一档”，在上海滩上呼风唤雨。阿德哥有真本事，绝对不是“瞎三话四”，伊的名气也是“一刮两响”。对于交关“七高八低”个事体，嘦落到伊手里统统摆平，所以叶圣陶称其为上海调人。阿德哥见多识广，面见“三等四样”人侪会鉴貌辨色。再讲伊做起事体来笃笃定定稳扎稳打，从来勿会“投五投六”。但也有好事个人“搞七廿三”，开坏伊讲伊是滑头模子。其实阿德哥字如其人，写两个字也是笔端笔正，根本呒没“七歪八牵”个毛病。事实浪向阿德哥勿仅勿是“七勿老三”个滑头模子，而且是一个输财报国个爱国商人。