迭两年我写征文得奖勿少，勿大稀奇了。不过参加由本届上海书展办公室和本报联合举办个《我与上海书展十年》征文活动，征文获得“二等奖”，倒是让我交关开心，因为搿篇征文我是用上海闲话来写个。 

　　两年前个书展里，我看到有人用上海闲话来写文章，好白相啊！乃末自家也试了写写看，投拨好几家媒体，叫啥人家侪勿要！想想阿要“殟【wak】塞”（郁闷）。后来发现新民晚报浪有“上海闲话”专版，我就拨搿种文章“譬如勿是”去投投看。呒没几天功夫就接到编辑老师个电话，想勿到伊对我个稿子评价蛮好，还老客气个脱我协商今后写稿要注意几个方面。讲句老实话，碰到搿种负责个编辑，我邪气服帖，非但想写物事多了，还会主动脱伊沟通，乃末我写稿个兴趣越来越浓，拨勿少亲眷朋友个胃口也吊起来了。伊拉常常会拉夜报每期“上海闲话”版浪看看，先看有勿有我个文章，顺便再看其他文章，一段时间读下来个认识是，搿个专版文章读来着肉、特别有亲切感，现在伊拉侪算是“上海闲话”版个“粉丝”了。 

　　我写上海闲话文章勿单讲老早头个事体，还拨现在身边个事体写出来，像老年社会个老年人种种个尴尬，我就写了《讲讲老年人迭辈里个事体》，有爷娘担心屋里个老姑娘嫁勿出去，我就用地铁里听到小年轻个对话，写仔《脱光勿脱光问题》，有眼老同事看仔我迭点文章，侪讲用上海闲话讲阿拉上海人个事体，如果换作普通话来写，味道就会变脱，就勿会有介好个效果了！有人还特特为寻到我来谈心，比方讲，现在勿少住拉四楼以上个老人，上下楼梯老吃力，一直是个问题。葛末我就以“电梯上上下下的享受”个广告词来反思写出了《上上下下个难受》。文章登出后老朋友道里侪像讲出了自家个心里闲话，开心个特地聚餐了一顿。对我来讲，我是更要感谢“上海闲话”版呢！ 

　　《新民晚报》上海闲话版个真诚，凝聚了一批像我一样个热心作者，丰富个作品迎来了2012年召开个出版100期座谈会，我是从新民网浪向自始至终看录像个。随后我拨编辑老师发帖谈了自家个感想。编辑老师告诉我，随后个上海书展里有“上海闲话”专集首发式，集子里就收进了我个刊文，还邀请我一道参加。我一直兴奋个盼望搿一天。2012年8月17日，我像出席隆重个典礼一样参加了书展。呒没想到我所有刊出个稿件侪收到专辑里了。迭天等待签售个人特别多，介闹猛个场面拨我看到了上海闲话个吸引力，更拨我有了写好上海闲话个信心。人侪看重感情个，搿两年脱“上海闲话”个真诚合作自然成了我迭次写上海书展征文极好个素材，虽讲题目是《上海书展为我写好上海闲话》，但真像有人祝贺我获奖时个评介，我是“用心在写”，所以我讲，是上海闲话拨我用心写出了“二等奖”。