今朝心想【心情、心境】蛮好，买了两客小笼到单位。

　　“菲菲，小笼吃？”“覅吃，我肚皮里一包气还呒没消化脱唻！”菲菲半爿面孔血血红，一眼胃口也呒没。“侬看我面孔喏【nao】，就是小笼闯个祸！”

　　原来，菲菲乘地铁碰到一个乘客吃小笼，一包卤飙到面孔浪，推扳一眼烫出泡来，还来得横【wang】对，讲啥上班早，吃早饭辰光也呒没，大家要体谅。

　　地铁里向阿好吃物事？我一向持否定意见。

　　公共场所各有各个功能，进食寻饭店，排泄寻厕所，明明是基本常识，现在偏偏争得面红耳赤。有排朋友嘲讥讥个讲，地铁浪小便也蛮正常，吃物事更加毛毛雨，又呒没制度约束。还有朋友讲，我也晓得勿对，但是饿伤脱哪能办？顶顶气人个就是菲菲碰到个，伤了人还强词夺理。

　　看看伊拉辣拉地铁浪除了吃小笼还吃啥？桂林米粉、臭豆腐干、韭菜饼！相比之下，有一个吃烘山芋个小姑娘引起普遍同情，理由是：“吃烘山芋总归比吃臭豆腐干、韭菜饼识相好？”实在是又好气又好笑。

　　其实，上海地铁每一站间隔辰光勿长，假使有啥紧急需要，稍微摒一摒，勿会摒伤脱。听一个朋友讲，地铁浪吃物事，容易引老虫【老鼠】，老虫对地铁个运行有破坏作用，听起来蛮危险个，我勿晓得搿是真个还是假个，写出来供大家探讨。

　　社会辣进步，现代人硬件教育上去了，文明程度也有待提高。真心希望大家从地铁浪勿吃物事做起，遵守公德，也希望有关部门能出台约束措施，帮忙维护秩序，让城市越来越美好。