搭伙，侬听得懂？老底仔上海滩呒没介许多吃食店、小吃摊、点心店，上海人也呒没太多个铜钿花勒一顿中饭浪，大家吃食堂。大一点个单位是开设职工食堂个。呒没自家食堂就去居民食堂解决吃饭问题，搿个就叫搭伙。上海闲话里个“搭”是丰富多采个。搭可以是名词，解释为某一块地方。这里，是搿搭块。那里，是伊搭块。两搭，是两个地方。各搭各处，是交关地方。搭当作动词来用，意思更加多了。搭是架是支是撑。“此地应该搭座桥，让大家方便点。”“搭几根毛竹顶牢搿块牌子。”搭也是合上合拢粘上粘紧。“快点拿门搭上。”“弄点胶水来搭一搭，就落勿下来了。”搭还是加上添上。“来一碗菜汤面，再搭两块大排骨。”搭还有把东西放到可以支架地方个意思。“伊感冒了，寻块湿毛巾搭勒伊个额骨头浪，快点快点！”搭最精彩个动作是指抓、指捉。“勿是我眼快手快一把搭牢搿只热水瓶，乃末好哉，要闯穷祸了！”“贼骨头还呒没窜出小弄堂，就拨几个便衣警察搭牢了！”一层一层意思看下来，大家可以推敲一记“搭伙”归到阿里一层里向了。标准答案自理。

　　一道做生活个同伴，可以称为搭手。请人家来帮一把，可以讲：“搭把手，相帮抬一抬！”搭一脚，是插上一手。搭手脚，是增添麻烦。搭手搭脚，麻烦弄来勿勿少。勒人际关系当中，上海人讲得最多个是搭讪、搭界、搭钩、搭僵。搭讪，与生人头或者熟人头呒话找话、套个近乎。“老头子搭新来个门卫去搭讪几句，以后停车子可以便当一点了。”搭讪也可以讲为搭讪头个。搭界，看字面就可以晓得搿个是有关系，有牵联个意思。“搿桩事件搭侬搭界？侬搭我关脱！”当上海人搿样子讲个辰光，就表明有吵相骂个火星子了。搭钩，本意思是指钩子。上海人引申出来是形容朋友、道伴。“我搭侬，搭得够！”搭得够，交情就勿是一眼眼了，可以称为知己、铁哥了。不过搭得够勿作兴用勒职场里个正规场合中。平常生活里可以钩肩搭背搭得够，走进办公室还是要正儿八经一点个。搭僵，一是差劲、蹩脚个意思。“菜水介搭僵，店堂介龌龊，调一爿饭店吧！”二是事体办坏脱了，呒没修正个办法了。“合同图章也敲脱了，乃末搭僵哉！”当然，还有比喻身体越来越推扳境地个。“唉，脑子搭僵，身背搭僵，老死哉！”

　　还可以搜寻出交关与“搭”相关个上海闲话出来。我搭一记架子，勿讲了。让大家来讲吧。