语言是文化个载体之一，语言类个文化必须依仗语言形式才能够传承下去。同样道理，上海闲话是上海地方文化个载体之一，假使讲有一天沪语消亡了，葛末上海地方文化会的发生啥个变化呢？ 

　　首先，垃拉老上海人里厢有深厚群众基础个沪剧就呒没【没有】了，因为沪剧是用上海本地闲话唱个。著名演员王盘声、丁是娥、杨飞飞等几代人辛勤培植起来个剧种就搿能介【这样】呒没了，侬总勿见得【不见得】叫演员用普通话来唱沪剧吧。其次，上海说唱也呒没了。袁一灵唱个《金陵塔》垃拉上海滩浪【上】是家喻户晓，脍炙人口，老上海侪会得唱几句。后来个黄永生搭仔【以及】一帮青年演员也唱得邪气赞【非常好】。不过，沪语消亡后，侬也听勿着【听不到】上海说唱了。第三，侬想看独脚戏、滑稽戏，对勿起，呒没了。独脚戏、滑稽戏垃拉上海深受群众欢迎，滑稽戏大师杨华生主演个《七十二家房客》曾经吸引了众多个上海人，“双”字辈滑稽演员表演个独脚戏至今大家津津乐道。假使沪语呒没了，独脚戏、滑稽戏也就呒没基础了，上海个滑稽剧团只好改名喜剧团了。侬想想看，滑稽戏用普通话来演出，还有啥上海味道 ？还有周立波个沪语“海派清口”曾风靡上海滩，虽然讲周立波准备了沪语搭仔普通话两个版本，假使沪语呒没了，周立波就只好用普通话来讲清口了，“海派清口”也好改名为“普通话清口”了。作为老上海，侬欢喜听周立波用上海闲话来讲“清口”呢？还是用普通话来讲“清口”呢？ 

　　好了上头讲个侪是“假使讲”，实际情况并勿是搿能，不过上海闲话垃拉青少年当中个弱势地位还是要引起所有关心上海闲话个人个重视。据上海社科院近日发布个一份报告，上海本地出生个中小学生只有60%基本浪会讲上海闲话，垃拉屋里讲上海闲话个只有一半，再过十几年，等伊拉【他们】长大以后，会讲上海闲话个人个比例还会得少下去。 

　　普通话从沪语里吸收过老多个词语，像“嗲”“作”“尴尬”“噱头”“蹩脚”“龌龊”等词侪是来自上海闲话。沪语里个交关【许多】俚语，像“额角头碰着天花板”【运气非常好】、“瘌痢头儿子自家个好”【敝帚自珍】、“讲得来花好稻好”“【吹得天花乱坠】”、碰着一个王伯伯“【王伯伯：答应了别人拜托的事情而后忘得一干二净的人】以及一些口语词，像“搞七廿三”“神志乌志”“瞎七搭八”“呜哩吗哩”“空心汤团”“鲜格格”“戳壁脚”都极富有表现力，假使沪语消失了，搿种介地方民俗色彩浓郁个词汇也就会失传了。就垃拉我写作迭篇文章个辰光，欣闻昔日同窗钱君编写个上海闲话教材将于秋季新学期开学时进入小学课堂，新民网“上海闲话”专页上线，SMG电视新闻中心即将推出《新闻坊》周六沪语版，迭个侪是推广、传承上海闲话个大好消息，相信上海闲话一定会得体现出伊个【他的】历史搭仔当今文化价值来。