老上海就是1992年前头个上海居民，因为搿后头到上海定居个侪叫做新上海人。

　　有个新上海人讲起上海闲话跟本地人一式一样，听口音已经勿一定分得清爽。葛末现在有种办法，假使要问老上海请教啥个事体，勿听声音也可以看得出眼门前个人是勿是老上海。

　　早浪七八点钟，买好油条用一根筷子串了走个，是老上海——因为上海人早浪欢喜吃大饼油条，老早仔呒没塑料袋纸头袋，就拨侬一张薄纸头，手捏上去忒烫，垫篮头里太短，有人就想出办法，用一根筷子串油条，既勿烫手，又勿龌龊，后来大家觉着搿个办法简单实用，就“行”开来了。现在马路浪车子多灰尘大，卖放心油条个店主侪用袋袋装了，用筷子串个人难板【很少】碰得着了。

　　下半日三点多钟，垃内环线外头个超市大门口边角角摆地摊卖水绿小菜【蔬菜】，全部小菜加起来顶多十来斤，而且拨侬个马夹袋侪是用过个，是本地农民——因为伊拉年纪侪是五六十了，种了一辈子田，欢喜每日动动身手，自留地已经呒没几分田了，种得少，告咾【所以】拿出来卖个也少，拿了少，城管过来要跑也省轻。用过个马夹袋只要是清爽个，仍旧脱侬装小菜。不过伊拉绝对勿会种反季节蔬菜个。

　　医院病房里向，家属拎仔大口保温杯来送饭个，是老上海——因为老早仔多数人家屋里呒没冰箱，保温杯摆棒冰雪糕勿会烊脱，带热饭热菜勿会冷脱，交关人家侪会得买一只派用场。上海保温瓶厂做个物事质量好，直到现在还蛮好用。后来厂里勿做了，外地搬到上海来个人，是呒没这种家生【用品】个。

　　垃点心店里拣“单档”或者“双档”买了吃是个老上海——因为面筋百叶包粉丝汤是上海个特色小吃，一只面筋一只百叶包叫单档，两只面筋两只百叶包叫双档，上海人一直搿能叫，点心牌子浪也一直搿能写个。后来有个店写面筋百叶包汤了。单档、双档是啥，勿是老上海勿晓得个。

　　城市发展了，老上海个生活习惯也慢慢叫垃起变化，不过，老习惯里向也包含了上海人个勤谨、精明、简约，说明伊拉会得过日脚。