文 / 金嘉炳

　　七十年代中期，经历了“文革”浩劫，商店里向个物事远远勿及现在迭能丰富，日脚末过得老清淡个，更加谈不上啥个生活情趣，唯一有一眼眼刺激个就是发奖金。

　　话起奖金，讲出来现在人恐怕要笑歪脱嘴巴。一个月一塌刮子、搁落三姆侪辣海——五只老洋。为仔体现差别，拉开差距，每个月单位里向还要像煞有介事个开个会评一下，日长世久，徒存形式。

　　一个冬天个下半日，奖金发下来了。小云拿到了全额：五块洋钿。正巧阿拉一帮子侪在一个班组茄山河。安国拉牢小云，要伊请客。小云邪气爽气，立时三刻摸出搿张还呒没焐热个钞票，不过提了个条件，哪能消化，要别人动动脑筋。几个人一商量，后日就是休息日，到老朱屋里向去叙夕，内容是自家动手包饺子。

　　我屋里离菜场顶近，葛末采办个任务就交拨我。到了秋日，卖了四斤热气肉，五斤富强粉再加二只角子个青菜，直奔老朱屋里。因为有四个半家庭参加，人手绰绰有余，分工合作，各司其职。拣菜、汏菜、汆菜个一档，斩肉个兼拌馅、和粉个带做皮子。十一点钟敲过就可以动手包了。秀荣是北方人，会弄面食。海瑞辣屋里也常常包饺子，当然由伊拉两家头挑大梁。安国调料是拿手个，馅子脱仔蘸料侪由伊操办。七手八脚，大小十几只嘴巴，边包边下边吃，简直闹翻了老朱个搿间亭子间。

　　大家还要比输赢，比比啥人包的卖相最好，而且下锅勿撑船。经过一致评比，侪讲秀荣包个最灵：胖笃笃像元宝。而海瑞个功夫辣擀皮子浪，边滚边转，边薄当中厚，包起馅来又多又勿会漏。自家动手个物事总归特别点，由劳动成果个含义。葛咾特别好吃，亨八冷打全部扫光。毕竟年纪轻、食量大、胃口好，外加人多闹猛。

　　一晃几十年，今朝回想起来还是煞辣势清，好还拉垃眼面前一样。五块洋钿做了大市面，真是往事似烟啊！