文/任向阳

　　天冷到河头里结冰个辰光，学堂里还呒没开始放假。教室里，有个同学捧仔铜脚炉当小手炉烘手取暖，有个同学穿仔布棉袄两只手镶辣袖子管里，有个同学老布衫套仔头绳【绒线】衫还辣刮剌剌发抖。一到下课铃响，大家豪燥朝外头跑。搿个是六十年代辰光，外头肯定要比教室里向冷，而且要冷得多。不过阿拉侪有得变冷为热个办法。烂泥场地拨女学生子快速占脱了大半，伊拉踢毽子、跳长短绳，只挺【留】下来几块小地方拨拉男生打菱角。搿辰光就一排教室，一块小场地，踢足球踢勿开，打篮球呒没球架。葛末阿拉男生也想活动活动好暖一眼。搿辰光“轧大王”就是一种特别有趣个会得白相来浑身发热个游戏。 

　　阿拉班里个男生先去抢占走廊里向个壁角，块头顶大个先立辣着着【最最】里向做大王，大家马上沿仔墙壁排成一队，从后头朝里向轧，人搭人贴牢仔拼仔命朝壁角里轧，一头轧一头“嗨吆”、“嗨吆”、“嗨吆”喊个勿停，喊一声轧一记，越轧越起劲。壁角里个大王两只脚撑牢仔墙壁，屏足仔全身个力道勿拨人家拿伊轧出大王个位置。搿就叫“把大王”，伊把辣越牢，大家轧起来越加起劲！第二个人要想办法拿肩胛骨贴牢仔墙壁，借力拿自己的肩胛铲到大王个背脊骨后头，再拿整个上身轧法轧法轧进去，辣“嗨吆”、“嗨吆”个一记记搞轧当中靠所有人个用力拿大王轧出去。实际上，大王蛮难轧得出个。因为大王块头大，力气大，可以拿第二个人弹轧出去，顶要紧个是伊可以贴壁靠墙，靠牢两个地方个牌头【依凭、支撑】来抵挡十几个人个进攻。不过阿拉小辰光蛮疯个，介许多人侪勿肯轻易认输。葛末就“嗨吆”、“嗨吆”用足仔劲忘命【拼命】去轧。拿大王轧出来个辰光，大家“好——”一记叫出来庆祝胜利，每个人面孔浪向只看见嘴巴搭仔眼睛一道笑。有个人还跑出队伍脱脱仔棉袄重新钻进队伍去轧。新大王末又迓【躲】垃里头神气活现起来。 

　　现在想想轧大王个游戏啥人当大王是蛮吃力个，介许多人个力道侪集中用辣伊一个仔人身浪向，要吃着比伊自己个体重多出交交关关个分量。但是伊还是开心了勿得了：人家轧勿脱，伊顶狠、顶大、顶着力【厉害】，感觉真像当上了“大王”一样。大王勒垃顶顶里向，不过啊，葛是轧不痛个。尽管吃着个力道蛮大，但是小学生仔身子骨侪是软个，人贴人，肉轧肉，勿尖勿硬，焐垃一道热呼呼个。轧大王是越轧越热，越轧越闹猛。大家侪想轧脱人家，勿拨人家轧脱自家。有个人轧得来额角头浪汗津津个，有个人轧得来喉咙也哑脱，有个人轧得来面孔血血红。还有个人门槛勿精，只顾轧人家，三轧两轧就拨拉人家轧出来了。啥人要是拨大家轧出来了，豪燥加到尾巴浪向再用足力道朝前头轧，轧到里向去。 

　　葛轧大王奥，是阿拉小辰光驱寒取暖的好办法。一道墙壁，一身劲道，一支队伍，一通暖意，结果是一团和气。轧大王简单而又有用，便当而又有趣，不但帮阿拉战胜了寒冷，还培养了阿拉勿怕失败个气魄，克服困难个智慧，融入团队个精神。