文/邢静(80后青年作者)

　　春节是一年当中顶大个节日，现在勿管是西餐中餐，想吃啥就吃啥。葛末老底子上海人过年个辰光，是吃眼啥个呢？

　　到仔大年夜，一家门要围辣一道吃年夜饭，搿是中国人一年当中顶顶重要个一顿饭。年夜饭浪向总归是要有鱼个，讨只口彩“年年有余”；老底子家家年夜饭侪要有酱茄子【落苏】，为个是“落”谐音“乐”，葛咾酱落苏也叫“安乐菜”；上海搭仔附近个地方，过年是勿吃饺子个，家家户户是吃用糯米粉做个年糕。“糕”，谐音“高”，高升、高兴、高寿侪是高，葛咾过年吃年糕也变成新年吉祥食品。除脱平常仔个年糕，还要做一种样子像元宝个年糕，名字叫“年元宝”，亲眷朋友互相馈赠，招财进宝讨口彩，堆盘“元宝”好过年。上海人过年还欢喜吃茨菰、老菱、芋艿、地栗。迭只风俗是老底子祭灶王老爷个辰光留下来个了，灶王爷每年正月前头升天向玉皇大帝汇报人间善恶，人人侪顶好伊报喜勿报忧，吃了前头四样物事，伊去汇报个辰光只讲茨菰（是个）、老菱（老灵）、芋艿（唔呐）、地（甜）栗就来事了。神仙凡人，皆大欢喜。

　　讲到祭祀用品，还有一样物事勿能勿讲。老早江南一带有腊月祭山神个习俗，祭山神用猪头，所以家家户户会得辣辣腊月里向腌咸猪头，祭山神以后过节个辰光吃。咸猪头也有讲究，要挑猪头上布满皱纹像“寿”一样个“寿字猪头”。初一早浪向要拜祖宗，三样物事定规要有：全鱼、全鸡、搭仔一只猪头，统称“猪头三牲”。现在祭祀个习惯拨当仔封建迷信破“四旧”破脱仔交关年数了，猪头咾啥上海人过年个辰光也勿大去吃了。倒是留下来两个骂山门辰光经常听到个词语：“寿头”———“寿字猪头”个简称；“猪头三”，特为省脱末脚一个字，迭句骂人闲话个本义：“牲”，也就是讲伊勿是人。不过现在人对搿两个词语是来源过年个食品，已经搞勿清楚了、搿个，也好像也有眼“寿头”。