上海个天气四季分明。3月、4月、5月春天，6月、7月、8月热天，9月、10月、11月秋天，12月、1月、2月冷天。每个季节3个月，大家勿吃亏。现在勿一样了，热天与冷天大出来了，春天与秋天缩脱了。呒没太长个辰光可以来穿春装跟秋装了。买衣裳个重头戏变成了去买夏装和冬装。欢喜打扮、欢喜翻翻行头个小姑娘告老阿姨对搿样个体会肯定更加深刻个。

　　天冷了，老早个上海人贴身穿绒布衫、绒布裤。后来更加方便与暖热个是套棉毛衫跟棉毛裤了。上海人把厚一点个针织棉纺内衣叫做棉毛衫。三枪牌是棉毛衫裤个上海名牌。伊出名辣当时放日本电视剧《姿三四郎》个辰光。“乓乓乓，三枪牌内衣！”搿也是电视里做广告个先行者。棉毛衫外面要穿衬衫。既要体面又要节约个上海人就行出了节约领。节约领为了省点衣料，只有一只登样个衬衫领头，像一件半截子个小马甲套辣肩胛上，告咾上海人还叫伊为假领头。假领头只要面子、勿要夹里，当时穿了假领头还是要拨大家叉叉个。衬衫外面穿绒线衫了。绒线衫就是北方人讲个羊毛衣了。上海个女同志都会自家来打毛衣——结绒线。一点勿会结绒线个阿姨妈妈辣伊个年代会拨人家背后讲两句：“我看伊勿是笨而是懒！连结件绒线衫、绒线背心都勿会，伊拉先生呒没福气……”怕冷个上海人有辰光还会套两件、三件绒线衫。加上下身还穿绒线裤、绒线袜，可以讲一个人身浪背了半爿绒线店了。真正个冷天里，上海人还会穿上棉袄、披上大衣。旧了一点棉袄，辣上海闲话里叫老棉袄。有点家当个人家用丝棉来做棉袄，衣裳个面布也用绸子来做，来显示自家个身价。农历新年，是弄堂里小囡穿新棉袄个最佳辰光。假使能够从里面新到外面，从头顶新到脚底，那就是有铜钿人家个宝宝子、肉肉子哉。

　　从棉毛衫、衬衫、绒线衫、老棉袄算到派克大衣，老早个上海人要穿五六套衣裳来过冬。重煞了。因此羽绒服个面世就解放了大家。羽绒服拨上海人叫作滑雪衫。滑雪衫勿但轻还穿了暖热，式样款式也要比老棉袄花头多。从此以后上海人过冬就瘦身了：一件内衣、一件套衫、一件滑雪衫，简单方便多了。“老三套”棉毛衫、绒线衫、老棉袄开始退出历史舞台。做人家个上海人还舍勿得扔掉搿点宝贝，还拿伊晒晒太阳、压压箱底。我九十多岁个老姆妈就翻出一条我半岁辰光穿过个开裆小棉裤，老布面子、绒夹里，还簇新簇新个。我拿伊当古董当心收藏了。毕竟阿拉大家侪是穿仔搿样个行头来走上人生道路个。