老早仔阿拉小辰光小朋友一道白相侪喜欢大家相互起绰号。好像越起了通俗越好白相，勿像现在小朋友名字越起越洋派,现在小朋友侪有一个英文名字，如果侬呒没看到人，还以为伊是外国人唻。一次，小区里一个小人辣拉叫“思密思·艾伦”，我回头一看，是阿拉隔壁头邻居明明。后来问下来才明白现在小人侪相互叫外文名个，勿像阿拉小辰光侪叫绰号个。

　　阿拉小辰光起绰号侪根据姓氏读音或者人体外形，比如，姓黄，阿拉勿叫人家皇帝，叫皇帝人家要生气个，而叫人家黄金糕。姓李个，就叫人家小栗子。拿人变成食物，觉得老好白相个。比如我姓裴，老想人家叫我诗人裴多菲，伊拉要叫我“老板(裴)”阿拉生气了，勿准伊拉叫。埃辰光又勿是现在，现在老板是多少好听个名字，多少神气。阿拉小辰光老板侪靠边站，侪要去改造个。要么辣弄堂里扫地，抬勿起头个。所以，啥人叫阿拉老板，我就跟伊急，要板面孔个。

　　当然，有人气量大，伊勿生气个。阿拉弄堂里有个好看美女，人家侪叫伊排骨，伊一眼勿生气，叫法叫法后来阿拉拿伊正式名字也忘记脱了。阿拉还有一个同学因为人痩，还比较活络，大家侪叫伊老鼠，伊一眼勿生气，后来大家习惯了，一直搿样叫。现在侪退休了，做外婆个年龄了，聚会辰光大家还叫绰号，一下子拉近了距离，回到了童年，讲讲笑笑好像还是十几岁。

　　起绰号还蛮有时代感，因为有了童年个绰号，阿拉大家永远勿老。