普通话里说无聊、说寂寞、说闲着无事可干、说时光难以打发，到了上海闲话里就此一句：“厌气”。厌气还是相当形象个。人个周围上上下下、前前后后被一团团惰性气体所包裹。要想走动，呒没方向。要想倾吐，呒没对象。要想激动，脑子一片空白。上海滩是一个流动个社会。上海人生活个节奏老快、老老快。一般意义上个上海人勿会感到厌气个。呒没啥个辰光啥个地方可以让侬足够感受到厌气。更呒没啥个人物可以让侬共享厌气时刻。上班、下班、等车子、轧车子、买菜、汏菜、烧菜、听电话、看电视、发短信微信、约会、聚会、开会、还有料理生活个琐事、洗衣、晾衣、收衣、扫地、拖地板、揩房间、揩面、汏脚、铺床、睏觉。上班族只会投五投六，忙得昏头落。呒没机会来发嗲白相厌气。领到敬老卡个更加怕厌气。寻个公园练练拳，寻点道伴跳跳舞，凑点搭子打打牌。退休生活个宗旨就是戒戒厌气。看电视里采访老头老太，回答是“阿拉退休了要比上班辰光还忙！”厌气假使是个卡通人物，葛末伊只好搭自家寻寻开心、消磨时光了。

　　厌气讨人厌。用上海闲话来讲，讨人厌就是触气。“啥人家拿纸板箱厾辣走廊里向，触气？”“我勿要搭小张坐一道办公，伊瞎触气，伊有点十三点个！”对事对人对物，触气就是讨厌。上海个小姑娘、小女生也常常把“触气”挂辣嘴边上。伊拉个欢喜搭讨厌常常是炒到一只镬子里向，叫人家吃大勿准。碰到搿样型号个“触气”，勿必上心。一笑而过。比触气要严厉一点个是“惹气”。惹气个惹用上海口音来读，相当于“柴”。勿能读成卷舌个普通话个惹。惹气也是讨人家厌。辣我个体会中，触气是可以教育好个讨人厌，而惹气是呒没办法来改进个讨人厌。“伊老惹气个！”搿位“伊”基本上是被定性为很讨厌很难拨人家接受个脚色了。

　　上海人可以讲出交关交关“气”个闲话来。老气、嫩气、喜气、霉气、旺气、晦气，等等、等等。厌气也好，触气也好，惹气也好，是一个人个感觉或感受。呒没计量表可以测定个。聪明一点个上海人在于识相。能识别出他人个触气和惹气指数，晓得避让与礼让。让人，只好自家吃力一点哉。搿样子才勿至于拨人家惹气了。

　　本期答案：1.b 2.d 3.c 4.a 5.a