一勿留心，讲讲写写上海闲话也勿少了。其实上海闲话托福还是要请语言学专家、吴方言学者来授课个。手头有一本《上海俗语图说》，收集老上海俗语240条，是1935年个版本，追溯考证了交关上海闲语个出处和来历。还有一本《上海话大词典》，由钱乃荣、许宝华和汤珍珠三位教授编著，罗列了老上海闲话、新上海闲话交交关关。要考出上海闲话四六级，一定要有专著帮一记忙个。前头一本书是买勿到了，后头一本书也难勒新书店里寻到。可以到旧书店里去淘淘看，看侬个运道了。我生勒旧上海，长勒新上海，就以上海闲话来讲讲阿拉上海人个故事吧。一直勒辣饭店门口摆粥摊，吃力煞脱哉。少来点上海闲话个讲解了。原谅。

　　几十年前头我画过一张漫画，《识字的请教不识字的》。讽刺个是读书人恭恭敬敬勒马路浪求教乡镇里来个算命先生，有文化个拜倒于呒没文化个。伊个辰光上海小马路、弄堂口还常常可以看到摆了摊头个相命先生、测字先生、起课先生。算个命，五块十块。愿者上钩。警察过来，大家收摊。还勿尽兴头索性搭牢算命先生一道迓到小弄堂里继续“革命”。我和算命先生个故事是靠廿年前头，勒安徽个一个小城市里。到伊面去白相个还有一大群同事。一早走出留宿个招待所，门口一侧有一个算命先生来拉生意，是一个老头，白发银须，有点“小神仙”个腔调。“贵人来了，贵人来了！”伊一把拉牢我。从十几个人当中认出“贵人”一点勿稀奇，因为同事们一路招呼我“领导、领导”。“领导”当然就是“贵人”。算一次命，十块。算吧。“我只要算算我阳寿多少，其余一概省脱。爽气点！”搿个老头问过我生辰，拨起指头，排过八字，念念有词，故弄玄虚。“贵人阳寿七十九！好命！”“好点啥！阿拉上海人平均寿命过了八十岁，我还活勿到。算错脱了，重算。重算加侬十块！”老头见钱开眼：“好，好！重新算过一定准足！”又来一番表演后，老头讲：“八十九岁！搿趟勿错了。”我还勿满意：“再加十块，再重新算过，我勿相信我就活勿过九十岁！”老头子笑了，笑得有点勿好意思了。“好哉好哉，贵人保证可以活到九十九！”“唉，侬也太狗屄倒槽了，加侬廿块了，侬还勿啥得让我活过一百岁！”同事们笑得前仰后翻。老头子则笑得更加难为情了。收进了三十块之后，伊讲：“下趟再碰见贵人，一定算到侬一百零九岁！算到侬称心满意！”

　　可以对不起别人家个命，勿能对勿起别人家个铜钿。哈哈。