黄霉季节一到，湿度高、气压低。早夜有点冷飕飕，日中心热烘烘。屋里向个墙壁、地板、家具、甚至衣裳都会湿搭搭。所以上海人讲：“黄霉天，吼势天。”

　　何谓吼势？查《上海话大词典》，吼势为呴势。意思为难以名状个难受。吼势个写法为呴势个俗称。假使没有词典个国际音标个注音，搿“呴”字是呒没几个上海人能够准准足足个读出来。我一直认为，要把大家平常日脚挂辣嘴浪个方言写成书面文字是一门大学问。能够准确个写下来，又能够拨大家所认可、所认得、所懂得，写读上海闲话就是一门考试题。

　　把呴势写成吼势，最早大约是于上个世纪个二三十年代旧上海个新闻纸。伊个辰光对吼势个由来还做过一点粗粗个考证。老里八早个上海人把天浪个彩虹称之为“吼”。虹辣夏天个雨后出现，届时天热气闷，叫人难受。于是吼时天也好，吼势天也好，这呴热就用出来、讲出来了。吼势天是形容天气，引申开来便是“发吼势”。因为诸事不快，郁闷烦恼，使性子发脾气，大家就会讲：“迭个老朋友现在正辣发吼势哉。”从发吼势个不快到寻事寻人发发臭脾气、骂骂山门，就拨上海人叫作“寻吼势”了。再后来，两人结怨，彼此积仇。上海闲话也以“伊拉两个人一直就有点吼势个”来表达了。

　　吼势是从天浪来个。吼势又变到人身浪去了。最终吼势还变成功了一种心情、一种感觉。吼势辣搿种情况之下，就简化为一个字：吼。举例吼者：因为福利分房拨同事轧出分配名单，吼。因为买了传说中个优质股票被股市套牢，吼。因为高考考分只差名校录取分数线一分两分，吼。以上个吼、吼势还来自大事体，而平常因为小个、迷迷小个事体个吼还真不计其数。因此辣熟悉个上海人之间侬会听到迭能样个上海闲话交谈：“唉！真正叫我吼煞！”“侬讲吼勿吼？”“吼”“吼！”

　　与交关老个旧个上海闲话一样，吼势也正在慢慢叫退出上海滩了。现在个上海小青年用“胸闷”来替代置换“吼势”了。胸闷，瞎闷，与吼势一样个意思。更有交交关关网络浪个新个、更时髦个词汇来与吼势争一席之地了。如此时势，借问一下“吼势”迭句上海闲话：“侬勿吃香了，吼？”伊呒没有应答。哈哈，“吼势”总归是吼势个。老吼老吼个。