勿要看搿歇【现在】辰光马路浪汽车、摩托车、助动车多得一天世界，辣拉三四十年前侪是脚踏车撑市面。上班族除脱步行搭仔乘公交车外，脚踏车是主要个交通工具。

　　当年我分配到徐汇区一家副食品工场做生活，姆妈看我走路勿便当，弄到一张脚踏车票，买了部28寸凤凰牌拨我踏。迭部脚踏车价钿一百廿八块，搿个辰光是一笔勿小个数目。小青工满师后月收入三十六块洋钿，要买一辆脚踏车，牙齿缝里得省个一年半载。勿过闲话讲回来，小青年有了块上海牌全钢手表搭仔一辆赤刮辣新【崭新】个脚踏车，走起路来也神抖抖。

　　我踏仔迭辆脚踏车上下班交关便当，碰到礼拜天就踏出去兜兜。小辰光，我去外滩看轮船，到龙华去白相，侪是靠11路电车（两只脚）。搿歇好了，脚踏车一踏，快得像一阵风。我踏脚踏车有点投五投六，有一趟，辣拉金陵东路马路浪，一勿小心车轮盘轧进2路有轨电车个轨道里向，钢圈边上个克罗米也擦脱了，还好额角头高，人呒没掼疼。俗话讲：用仔爷娘铜钿勿肉麻【心疼】。迭部脚踏车虽然是我唯一个高档物事，我个派头也勿是一眼眼小，有熟人开口借，呒没一趟回头过。搿个辰光国产脚踏车质量好，市面上最吃香个。我迭辆凤凰牌普通车也勿推板，车架子敲敲当当响，也蛮吃重。我寻开心讲：可以踏两只大猪猡了。

　　我踏仔迭辆车子跑了城隍庙呀南京路呀老西门呀静安寺呀西郊公园呀。热天介夜里向，有辰光想吃杯赤豆刨冰或者冰淇淋橘子汁咾啥，豪燥【马上】跳上车子，从肇嘉浜宛平路踏到淮海中路。我也踏仔车子到南翔、青浦朱家角兜白相。最远一趟是去海门外婆家，勿过我呒没本事踏仔车子横渡长江，是多买了一张船票，连人带车搭船去个。

　　脚踏车踏仔十几年，变成了一部老坦克。我眼热人家踏轻便车，也买了部26吋个永久牌，老坦克就囥拉单位个车棚里向。勿是吹牛皮，迭部老坦克只要打足气，照样跑得邪气快。