B11:星期天夜光杯/上海闲话
     
本版列表新闻
     
2014年08月17日 星期日 放大 缩小 默认   
小八腊子“嘉年华”
丁婷婷
配图 / 桑麟康
   /丁婷婷

  上海老运动员沈坚强办了一家游泳俱乐部,游泳俱乐部就辣威海路浪。每趟我走过辰光闻到消毒水漂白粉个味道,我总归想起上世纪70年代,南京西路浪个新城游泳池,伊搭真是小八腊子白相个好地方。

  几十年前头,大名鼎鼎个新城游泳池就辣海南京西路成都路口(现在个南证大厦此地块)。

  伊辰光一放暑假,去新城游泳是小人个最爱。小人享受学生场优惠,8分洋钿一张游泳票,辣水里泡脱一个钟头,又风凉又可以白相,价廉物美。外加,一个礼拜要去三趟,要么一三五,要么二四六,买连票个。去起来,一般侪是学堂里同学轧好道,一道去;要么是兄弟姐妹大个带小个一道去,大有小八腊子开会了个感觉。告咾,一到大热天,新城游泳池门口最闹猛,进进出出侪是个学生子,日场连晚场,有辰光游泳池里人多得像插蜡烛。

  新城游泳池个闹猛让隔壁一家两开间个洁民食品店也闹猛起来了。一个钟头一场,一歇歇就起个蓬头。放出来个学生子,侪会轧到店里买点心冷饮吃,店里向就像打翻了田鸡箩,叽叽喳喳,一浪高过一浪。侬买啥,伊买啥,互相之间哇哇商量;有个还要哗【wha】啦哗啦,喂喂,侬借我一分洋钿!小朋友头发浪向面孔浪向侪是水。还有一点男小囝,拿湿溚溚个毛巾、游泳裤顶了头高头。伊拉喉咙砰砰响,急出乌拉叫,“买买”。柜台外头一层一层个小人,伸出来个手捏仔一张湿溚溚钞票,差勿多戳到营业员个面孔浪向。

  伊个辰光,大多数大人侪会拨小人一点铜钿,小八腊子个消费水平大概分三个档次,5分一档、一角一档、两角一档。有5分洋钿个小朋友就好买一只4分个糖糕,糖糕是三角形个,像大写个英文字母A,黄黄个油滋滋个甜甜个,也蛮受欢迎。有一角个小朋友高级点,可以买一只糖糕,再加六分洋钿个一杯酸梅汤,或者是糖糕加4分洋钿个一根赤豆棒冰,又吃点心又吃冷饮。贰角个小朋友就更加高级了,可以吃蛋糕搭仔牛奶,一块圆个清水蛋糕,7分洋钿,再加一瓶可可牛奶,1角3分。或者一只8分个鸡心白元蛋糕,再加一根8分个奶油雪糕。不过大多数小朋友侪是一角个水平。

  伊个辰光,洁民食品店店堂间里还有两只火车台,还放了几只凳子,本来是让人家轧朋友个情侣、年纪大个人买了牛奶坐下来慢慢吃个。碰到搿个辰光侪部拨小八腊子占领。伊拉个白相好像还勿煞念,有个人就头对头坐辣海茄山河;有个人互相之间物物交换,大家尝尝味道,用现在个闲话讲,叫分享,伊拨伊咬口棒冰,伊拨伊咬口糖糕;一面讲一面还要拿手里向滴水个游泳衣裤绞绞干,弄得店堂间里侪是个水。店里向个老师傅就只好拿仔拖畚拖地板,一边拖一边骂:“小鬼头,侬看看看,人家勿要掼死啦?”真个,搿个辰光,侬看到侪是一只一只笑歪嘴巴个面孔,扎劲是扎劲得勿得了;侬听见是咯咯个笑声。想想也是,又白相,又好有的吃,勿开心又老爷了。

  更想勿到后来阿拉学堂里个好几个年纪比我轻个老师侪讲,伊拉小辰光辣新城游泳池里游好泳侪到洁民食品店里买物事吃个。讲起当时个样子,个个人还手舞足蹈,味道交关好。伊拉讲搿个辰光呒没现在啥个海滩游、欢乐谷搿能个豪华,不过,仍旧是阿拉小八腊子个“嘉年华”。我想,是呀,搿个辰光小人更多个是辣海享受同学之情、手足之情,搿是千金难买个。

  现在,辣拉南京路浪再也呒没新城游泳池了,再也看勿到洁民食品店了,再也见勿到一群群小八腊子嗡进嗡出个开心煞脱个场面了。

     
放大 缩小 默认   
   第A01版:一版要闻
   第A02版:南京青奥会特别报道
   第A03版:南京青奥会特别报道
   第A04版:上海新闻
   第A05版:上海新闻
   第A06版:一周新闻人物
   第A07版:新闻面对面
   第A08版:新视界
   第A09版:新民图视绘
   第A10版:2014夏令热线特别报道
   第A11版:中国新闻·广告
   第A12版:国际新闻
   第A13版:体育新闻
   第A14版:文娱新闻
   第A15版:新民资讯
   第A16版:广告
   第B01版:星期天夜光杯
   第B02版:读书/星期天夜光杯
   第B03版:星期天夜光杯/夜光杯
   第B04版:夜光杯/星期天夜光杯
   第B05版:星期天夜光杯/阅读·连载
   第B06版:都市专栏/星期天夜光杯
   第B07版:星期天夜光杯/记忆
   第B08版:译文/星期天夜光杯
   第B09版:星期天夜光杯/新智
   第B10版:百姓纪事/星期天夜光杯
   第B11版:星期天夜光杯/上海闲话
   第B12版:上海珍档/星期天夜光杯
   第B13版:金色池塘
   第B14版:晚晴风景/金色池塘
   第B15版:金色池塘/长命百岁
   第B16版:家装专版
小八腊子“嘉年华”
上海闲话里个“动物”(2)
丝瓜筋
老虎变仔偎灶猫
汏 手
世界杯:一展“中国功夫”
新民晚报星期天夜光杯/上海闲话B11小八腊子“嘉年华” 2014-08-17 2 2014年08月17日 星期日