想起小辰光个零食真是多得勿得了，啥个盐浸花菜咖辣菜、桃板杏脯，啥个话梅盐浸枣、白糖梅子山楂片，等等，等等，侪是一分两分孩童个闲食。我清清爽爽记得，我屋里马路对面弄堂口有个小贩，支起一只打开个木箱子，里面侪是一摊摊零食。小贩是个胡子拉茬个小老头（其实或许勿老），静静个坐辣海，也勿叫喊。只要天勿落雨，伊总是勿声勿响个坐拉，偶尔从口袋里摸出存下个半支烟，点上火，呆呆个抽着。迭个是上世纪五十年代个小风景，现在辣末生头想起来真有点感慨，日脚过得真是快。

　　讲到零食，我还想起一个叫卖零食个小贩，就是“一分洋钿喫大菜”。迭个是小贩推仔四只轮盘个小车子，上面摆着一只烧旺个煤球炉，炉子上一只大砂锅，里面放着切成一小块一小块个肺头、夹干之类个猪下水（迭个辰光猪肺、夹肝一般人家是勿喫个，像鸡鸭肚肠一样，只是辣饮食店用来做鸡鸭血汤），锅里汤汁烧得红腻腻个。大多数是下半日，小贩个车子穿街过巷，一边高声叫着：“一分洋钿喫大菜——”声音中浓浓个肉香辣小贩身后散溢开来，倒是蛮诱人脾胃个。搿歇辰光两三个男小囡禁勿起肉香个诱惑，跟辣小推车后头，从裤袋里摸出一分两分，嘴巴里叫着：来，喫大菜。乃末小贩停下来，用竹签挑起一块肺头或者夹肝，交到小囡手里。有个小囡一口放进嘴里大嚼，油水从嘴角流下来，滴辣衣裳浪，用袖子管揩揩：“好喫，鲜得来——”；有个勿舍得一口报销，咬一口嗒嗒滋味。小囡红扑扑个面孔笑得像一朵花。凭良心讲，当年也呒没人讲迭个是勿卫生个。物事汏得清爽，水烧得开，想来事体勿大。

　　老底仔小囡袋袋里向铜钿勿多，喫根棒冰四分算是奢侈哉，非到大热天爷娘才舍得买根棒冰拨小囡喫，更覅想经常喫生梨、苹果、香蕉了。所以一分两分个闲食最多，除了上面讲个还有糖果蜜饯，啥个香草橄榄、敲扁橄榄、咸橄榄等等。不过“一分洋钿喫大菜”拨我印象顶深，老实讲我是否喫过，因为年代忒长远，实在记勿得了。总而言之，埃歇辰光个小街弄堂里个零食数勿胜数，赤豆糖粥、油煎臭豆腐干、炒白果、油豆腐线粉汤、奶油白糖鸡蛋片、珍珠米【玉米】、沙角菱——搿些小贩老老实实、兢兢业业，赚个侪是辛苦钿，叫人感动。当然，“一分洋钿喫大菜”，也许能够看见、想起个老上海勿多，讲出来拨大家凑凑趣。