阿拉小辰光老喜欢过国庆节，觉得比过年还开心，天气好，不冷，还可以穿漂亮个裙子。上世纪70年代初，阿拉还辣读小学辰光屋里侪呒没电视机，最最开心国庆节有大游行好看。挨个辰光大游行只朝南京路外滩走，阿拉屋里住辣南京东路边浪一条弄堂里，看大游行相当方便。搿能国庆节阿拉屋里就老闹猛了，阿姨、舅舅屋里一家门侪来了，特别是伊拉小人侪来了，侪来看大游行了，阿拉一道白相真老开心嗰。

　　十月一日大游行，交通侪管制呒没车子可坐，阿姨一家门舅舅一家门侪住了离南京路蛮远嗰。所以，前一天就侪来了，阿拉屋里蛮小嗰，夜里困觉只好打地铺了，大人侪困地铺，小人困了棉床，小人开心得不得了，激动了还困不着，第二天一早三四点就爬起来了，我带队，每个小人拿个小凳子，带上大人为阿拉准备个干点心走了。

　　阿拉总归坐了第一排，坐辣周围个侪是同学、邻居，侪是熟面孔，我还搭伊拉打招呼，介绍我个弟弟妹妹。天亮了人就会越来越多了，后面有好几排人，阿拉坐了第一排开心啊，坐了辰光蛮长了吃力了，听到讲人民广场游行队伍要出来了。阿拉头一直抬着盼望游行队伍快点到，直到游行队伍到了，就激动了拍手。

　　游行队伍真好看，社会浪各行各业个游行队伍各有特色。不晓得因为啥，我最喜欢看个游行队伍是腰鼓队，不但人好看姿势好看，而且敲出个鼓声还老有节奏感……游行队伍走光了，阿拉小人肚皮侪饿了，回到屋里大人已经准备好了饭菜，大家辣一道吃了老开心，节日里有新发个鱼肉蛋各种吃个票子，姆妈侪买来了，阿姨舅舅伊拉还带来交关吃个东西。台子浪摆满了。

　　夜里南京路还有灯光，阿拉吃好饭就去南京路了，看灯，看放烟火，一只烟火辣天空浪开花，大家又叫起来，又是老开心了，夜里交通还是受到管制，车子还是呒没嗰，屋里客人还要住一夜，阿拉又老开心了，屋里还是老闹猛嗰。

　　第二天吃好早饭，阿姨舅舅伊拉一家门侪要回去了，我要搭伊拉小人再会了，心里有点不舍得，伊拉小人也不是老开心，不过伊拉讲可以回去跟伊拉个同学小朋友讲看大游行个事体、还有看烟火个事体，同学小朋友侪喜欢听嗰。侪会搭伊拉老要好嗰，伊拉还有作文可以写，读出来老师还要表扬伊拉了。伊拉走了，我就希望下趟国庆节快点来。