金银花，学名忍冬。之所以叫伊迭个名字，是因为伊可以熬过寒冬腊月，仍旧枝叶葱茏。

　　金银花开辣初夏，不过，伊花期蛮长，刚开辰光，花是白颜色嗰，两三天之后，花就变成黄颜色了。新搭仔旧，黄搭仔白，像煞是金银相配，邪气好看，所以，又叫伊金银花了。

　　“忍冬清馥蔷薇酽，薰满千村万落香”，讲嗰就是金银花盛开季节个场面，金银花好养，枪篱笆旁边，小水沟附近，一丛丛绿叶枝条，一蓬蓬金花银花开；跟迭个辰光同样开足开满个蔷薇花一道，香气满世界飘。

　　其实，金银花向来也是一味中药，从前辰光，几乎所有个小朋友侪用过嗰。老底子呒没空调，大热天到了，交关小朋友难免要生痱子、热疖头，再或者是伤风感冒喉咙痛了，小朋友人小，也勿大好随便吃药，一瓶金银花露就是好物事了，清热解毒，名字也好听，三哄两哄，也容易叫小朋友张口，总归是花花草草，勿像青霉素搭仔先锋霉素，听上去总归有点吓人倒怪。

　　当然，搿歇大热天辰光，自家有空，泡一壶金银花茶，既清热解毒又经济实惠，好过买一盒东北大板，吃好仔寒气结辣胃里。

　　下半天辰光，摘一把金银花，汏汏清爽；茶壶里水烧开，金银花摆下去，烧1分钟，焖10分钟，花捞出来，汤水滗滗清爽，冷一冷，就可以吃了。淡淡交茶水带一点点清苦，再配一小块沙琪玛，甜悠悠，糯笃笃，老适意。