我眼门前常庄老会出现小辰光个一幕：天暗下来了，弄堂口上街【ga】沿个西瓜摊也闹猛起来。电线扯【ca】拉竹竿浪，电灯点得锃锃【shang】亮，旁边好几只竹筐里堆满了西瓜，玻璃橱窗里一块块切好个西瓜，像一只只帆船整齐排列。卖西瓜个人弄得勿好会吓一跳：一个大模子男人，赤着膊，头颈骨浪吊块毛巾，手里拿把老长个西瓜刀，搿把刀跟“老刀牌”香烟壳子浪个海盗刀差勿多，看上去蛮凶相。伊还拉直了沙喉咙：“西瓜要吃？煞辣里甜个来！三百、五百来块一。”调头抑扬顿挫，交关好听，马路对面也听得清爽，乘风凉人侪叫伊“麒麟童”。

　　卖西瓜人搿句“唱词”是老上海耳熟能详个，听上去交关适意，大家也侪会哼，搿搭要解释一下：一是“煞辣里”是象声词，象征成熟个西瓜，用刀切下去，会发出“煞辣辣”个声音；“煞辣”又是一个上海话的词语，意思是“爽快、非常”。并勿是“杀癞痢”；二是搿个辰光“三百、五百”，相当于现在三分、五分。搿个辰光物价低，工资也少；三是“块一”，就是“一块”。为啥倒过来喊，我想大概是为了顺口吧。

　　吃切好个块头西瓜，大多是过路人，嘴巴干了；或者是做小生意人、拉黄包车夫、踏三轮车人等等。假使是附近居民，也是小囡乘风凉辰光，吵着要吃。老早阿拉屋里勿算有铜钿，但摊头浪切好个西瓜是勿吃个。大人一买就是好几只，甚至几十斤，一只只排垃墙脚跟。搿个辰光屋里根本呒没冰箱，吃个前头先拿西瓜装进竹篮，浸到井水里，歇一二个钟头，再吊起来开，也算是冰镇西瓜了。

　　我跟兄弟吃西瓜还弄出花头经，半只西瓜对开，每人半只里向半只。我拿西瓜摆拉大碗浪，先啃脱个尖头，再用调羹【汤匙】换过头，用调羹柄朝瓜中央戳下去，再一转，有一个圆洞，让瓜汁漏下去，等西瓜吃光，下面碗里还有半碗西瓜汁可以吃。搿个辰光个西瓜品种侪是平湖瓜，长圆形个像只枕头，葛咾上海人也叫伊“枕头瓜”。瓜囊是黄白色个，又叫“老虎黄”，吃口交关甜。至于解放瓜、8424侪是后来个新品种了。讲句老实话，老上海还是蛮怀念平湖瓜个，为啥现在市面浪看勿到了。

　　半个多世纪过去，勿要讲“老虎黄”个平湖瓜勿见了，埃种卖西瓜吃西瓜个氛围，好像也难以寻得着了。