文 / 任向阳

　　现在想垃拉外头听到上海闲话好像是一桩难难板板个事体，假使勿是走拉淮海路浪，假使勿是跑拉小弄堂里，好像跟垃拉外地个感觉差啥勿多个——耳朵里听大勿到上海闲话了。

　　不过垃拉“市百一店”底楼，侬可以老适意个告【与】营业员讲上海闲话，搿眼卖羊毛衫个营业员侪是眉清目秀个老上海，要是侬个眼光看拉阿里一件羊毛衫高头，伊拉就会得用勿快勿慢个上海闲话跟侬介绍：“迭件羊毛衫个颜色蛮配侬个，款式老别致个，料作一眼也勿假，迭两天正好垃拉促销打折，假使欢喜个闲话侬试试看。”衣裳试过，生意成功，营业员个一番参谋功夫呒没白付。要是侬觉着还想再拣拣看，伊拉会得顺手帮侬拣一件告侬配得上个，假使再勿喜欢，伊拉仍旧会得像阿姐一样跟侬讲：“再去兜兜看好唻”。

　　除脱小菜场、小超市、小摊头，好像大商店里只有 “市百一店”底楼个营业员侪会得垃拉店里向、垃拉上班辰光告顾客讲上海闲话。伊拉个想法老实在的——“上海人当然要讲上海闲话，顾客觉着亲热，阿拉觉着有用。阿拉又勿是为了讲上海闲话而特特【dhik】为【特地】讲上海闲话，阿拉要晓得顾客个想法，阿拉要向顾客介绍店里个物事 ……当然，阿拉普通闲话也讲了蛮标准的。”

　　从搿个当中可以看出来，一、“讲”浪开花。沪语作为一种文白勿尽相同个方言，顶要紧个还是要讲（文字只是口语个记录），讲，只有垃嘴巴浪向讲出来，再好交流、传承，所以，会得讲上海闲话个人，要坚持讲。常庄【经常】讲是个好办法。搿能介就勿会得拿上海闲话忘记脱，搿能介讲个人就会得多起来。二、讲个人多了，就会形成上海个方言环境。搿种方言环境勿仅仅是语言上个口头交流，还是对地域文化个心理认同。沪语方言也是一种群体交流和沟通个方言，假使只垃拉屋里讲，只对自家人讲，而勿到外头去讲，勿对别人家讲，葛末上海闲话个语言环境就有得老大个局限，就勿算是理想个环境。葛咾要大家讲。三、要有地方。现在专家拿课本也编出来了，学生仔可以课堂浪学了回转去讲，当然下课了也要有学生之间个交流环境，搿个是最重要个。葛末现在电视里向、广播里向、报纸高头侪有得一点点个沪语专题告专版，比赛咾啥活动也多起来，出个书也容易看得到了。不过，上海闲话是人搭人之间口头交流个方言，因为现在勿像前头介通行，葛咾需要有一个到几个大家侪晓得个可以通行上海闲话个大一眼公共场所。垃“大世界”里向开一只《沪语乐苑》，集上海闲话个教学、培训、体验、交流、竞赛、游艺咾啥于一堂，应该是可以论证尝试个事体。