交关上海人家辣辣过年烧菜个辰光会用到氽好个肉皮做食材。比如讲先拿氽好个肉皮摆辣温水里泡软，再按需要切成块或切成条，然后与冬笋片、肉圆、鱼圆、蛋饺咾啥一道烧一只什锦暖锅，味道鲜是鲜得勿得了；或者还可以用氽好个肉皮与胡萝卜、面筋、香菇、黑木耳等等配菜做一道炒什锦，色香味侪有了。

　　但是老底子想要吃到搿眼用氽好肉皮做搭头个菜邪气勿容易，因为所有个副食品侪是需要凭票供应嗰，啥人会舍得用肉票去买氽好个肉皮？所以阿拉侪是自家氽肉皮嗰。哪能做呢？首先是平常日脚吃肉个辰光，拿肉皮剥下来吊辣屋檐下头风干。等到年夜脚下，就拿搿眼风干肉皮摆辣食用碱水里向汏清爽、吹干，然后就可以开大油镬氽肉皮了。氽个辰光还必须用两只铁钩子勾牢肉皮两头用巧劲拉伸，确保肉皮涨开又勿会拉断，等到肉皮氽到金黄色，拉伸也拉到极限个辰光就可以起锅了。起锅后，氽好个肉皮要乘热摆进冷水里浸一浸。迭能肉皮会再次膨胀，内部呈蜂窝状，就算大功告成，可以成为上海人家桌头浪向一样乓乓响个食材。

　　可能现在有些人会讲，搿眼氽好个肉皮当然好吃，就是氽个辰光忒费工夫，吃劲吃力勿合算。但是侬要晓得，辣辣物资短缺个年代里，自家动手氽肉皮，勿仅能够丰富餐桌浪向个花样经，满足舌尖浪个需要，而且迭个过程本身也透露出一种春节个气氛。