侬晓得“夹忙头里髈牵筋”迭句沪语口伐？可以讲，迭是一句老上海闲话。葛末搿句闲话啥意思呢？先看看下面两桩事体。

　　去年冬天一个夜里，我从睏梦头里醒过来，觉得喉咙发干刺痛，头脑昏东东，身浪出虚汗，一点力气也呒没。只好叫醒爱人，请伊帮忙量体温，结果一看体温超过39摄氏度。匆匆穿衣戴帽，叫了一部出租车去医院急诊。到了“挂号窗口”，刚拿病历卡和医保卡递进去，结果马上被退了出来。仔细一看，原来出门辰光昏头搭脑拿错卡片，医保卡呒没拿，拿了张身份证。我无奈一声哀叹：唉，真是夹忙头里髈牵筋。

　　还有一趟，我连夜用电脑整理资料，眼看已经写到结尾，啥人晓得小区突然跳闸停电，结果之前个辛苦侪是做了无用功。唉，真是夹忙头里髈牵筋。

　　写到搿搭，大家应该明白“夹忙头里髈牵筋”是啥意思了。首先，句中“牵筋”就是“抽筋”，引申出来就是“行为或行动受阻”。“髈”与沪语“胖”同音，意为“大腿”，所以，猪大腿通常被称为“蹄髈”。而且，古时候此字通“膀”，同沪音“榜”，意为“手上臂”，常被称为“臂膀”“肩膀”。一旦大腿或大臂抽筋了，当然啥事体侪办勿成了。其次，句中“头里”意为“当口”。所以，“忙头里”就是意指“繁忙或紧要的当口”。类似句式还有：睏梦头里得道成仙。搿句闲话有两种理解：一是“日思夜想、一门心思盼望得道成仙”；二是“得道成仙只是空想而已”。最后，句中“夹”字意为：“与……紧挨”“与……凑在一起”。“夹”的沪语同音字有“隔”和“膈”。所以，“夹忙头里髈牵筋”就是指：正在办正事个要紧关头偏偏出了意外状况，掉了链子。