小辰光天一热，每天早浪起床以后，屋里做个头一桩事体就是烧泡饭。炉子浪向一镬子水烧开以后，拿隔夜冷饭倒进去，用饭勺搅一搅，盖上盖头等水再次烧开就可以盛起来吃了。有辰光为了节省辰光，夜里睏觉之前先烧好一热水瓶开水，第二天早浪向直接用开水冲了冷饭里，再用筷子搅一搅，马上就可以吃到热气腾腾个泡饭，邪气便当。

　　侬覅以为迭碗泡饭清汤寡水，吃起来肯定呒啥味道，其实搿顿早饭个花样劲侪辣搭配个小菜浪向。考究一眼个人家，可以剥只皮蛋或者咸蛋，再弄点油氽花生米外加半根油条蘸蘸酱油，搿种腔调完全可以告吃面包嵌黄油别苗头。但是一般来讲，大多数人家还是拿萝卜头、大头菜、什锦酱菜、白糖乳瓜、糖醋蒜头、乳腐、醉麸咾啥来过泡饭，迭个就叫“大众化”。

　　勿过，对我来讲，热天过泡饭个最佳配菜则是姆妈亲手做个凉拌西瓜皮。热天是西瓜大量上市个季节，小辰光放暑假辣屋里捧着西瓜边啃边看电视里个动画片一直是充满幸福感个记忆。等西瓜里鲜红瓜肉吃完后，姆妈会把吃剩个瓜皮收集起来，外面削脱一层绿皮，里面削脱一层瓜瓤，留下来个瓜皮切成寸把长个细条，用盐腌脱一两个钟头（有辰光也会腌一晚上），捞出来沥干，浇上酱麻油，再摆眼糖拌一拌，就是一盘凉拌西瓜皮。吃起来刮辣生脆，还有一种特别个清香味道，用伊过泡饭邪气灵。据说，西瓜皮还有清热、解毒、利尿个功效，也算食药同源。

　　一晃几十年过去了，现在屋里已经勿大吃泡饭了，因为据说搿能吃法勿利于充分咀嚼食物，加重胃部负担，容易得胃病。勿过我从姆妈搿搭学来个凉拌西瓜皮仍旧是我个“保留节目”，时勿时动手做一份，既为热天个餐桌添一只菜，也为垃圾减量做贡献。