1964年夏天，我所在连队奉命执行任务，黄昏时到了一个叫司旺营个小村。连长决定就地休整一夜。大家安顿好以后，离开饭还有个把钟头。

　　部队有传统，住辣村里就要帮老乡做事。战友们有个帮忙打扫院子，有个帮老乡挑水劈柴。我跟辣挑仔粪桶个副班长后头，准备帮菜园浇水。

　　副班长个老家辣辣安徽金寨农村，比我早两年参军，平常对我搿个“城市兵”相当照顾。记得我第一次参加实弹演习，扛仔百把斤重个弹药箱往阵地浪向送，伊一直跟辣我后头，一路提醒我“当心”，怕我掼倒。有辰光急行军，看我跑得上气勿接下气，伊也常常帮我背装备。想到伊平常邪气辛苦，我就紧走几步，抢过粪桶担子讲：“副班长，侬歇歇，让我来挑。”伊眼睛眨法眨法盯牢我问：“侬来事口伐？”我拍拍胸脯：“现在扛弹药箱轻轻松松，两桶水算啥？”副班长呒没再推让，只是辣我背后关照：“当心点，勿要别着腰。”我心里想，伊还当我是“学生兵”，小看我。

　　到了河浜边浪，我拿两只粪桶倒扣到水里向，盛满水就挑起来。啥人晓得呒没走几步就发现桶底勿停漏水，仔细一看，桶底周围个凹塘里有交关细缝，水一歇歇就要漏光了。我心里勿由埋怨起副班长来，挑水也勿借副好点个粪桶。

　　正当我束手无策个辰光，只看见副班长一边朝我走过来一边关切地问：“哪能啦？”又讲：“我讲侬勿来事，就是勿来事。”我指指粪桶讲：“桶漏得介结棍，叫我哪能挑？”副班长看看还辣漏水个粪桶讲：“侬等辣边浪，看我挑拨侬看。”我一眼勿服气：“有啥好看，难道侬来挑桶就勿漏啦？”副班长只是笑笑，呒没讲啥。

　　当满满两桶水重新拎到岸浪，只看见副班长随手抄起一捧灰土，分别辣两只粪桶个内壁撒仔一圈，一歇歇工夫，两只桶果然侪勿漏了，我一记头戆脱。呒没等我弄清爽是啥道理，副班长已经扁担上肩，挑仔粪桶朝菜园走过去。伊边走边讲，此地交关日脚勿落雨，粪桶勿像屋里挑水吃个水桶天天要用，粪桶个木头因天气干燥而收缩，板缝变大，所以会漏水，盛满水后只要往桶底撒一圈泥土就会塞牢缝隙。他“嘿嘿”一声又讲：“搿个是滴滴刮刮个土办法，邪气派用场。”

　　当时我还有一年勿到就服役期满，勿要讲军事训练我获得过“神炮手”称号，就是插秧割稻、种菜养猪也勿比人家推板。有辰光也会得鲜格格辣新兵面前摆老资格。搿趟挑水个遭遇让我交关惭愧，觉着自家还是一个新兵。

　　一晃五十多年过去了，搿桩事体我仍旧记得邪气清爽。正是搿趟挑水个教训，后来我再也勿敢辣别人面前摆老资格。大家讲部队是个大学校，搿个闲话一眼勿瞎讲。