现在个上海，“群租”是个老大难问题。市场经济下头，有房东出租房子，自然就会有得借房子蹲个租客，至于哪能会得搞成群租搿副腔调，问题我觉得主要还是出了“二房东”身浪向。为啥迭能讲？因为“二房东”也勿是啥新鲜物事，老里八早就有了，反映解放前生活个滑稽戏《七十二家房客》主角之一，就是一个“二房东”。

　　老底仔上海个房子，多数侪是弄堂个石库门，一般一楼一底，里面客堂间、灶披间、卧室样样侪有，一家门独门独户住了里向邪气写意，告咾常桩是以一幢为单位出租。后首来，上海人口激增，寻房子个人多，市面上个房子少，有种人发觉搿也是一门生意经，索性当起了“二房东”。所谓“二房东”，也就是先出钞票拿一幢房子借回来但是自家勿住，再拿房子隔仔交关间借拨真正个房客。当时个一幢石库门房子住上头廿份人家一眼勿稀奇，所以“亭子间嫂嫂”、“三层阁好婆”“后楼里妹妹”，“灶披间阿姨”等称呼开始行起来了。

　　不过，原来一家门住个房子现在几十个人蹲，哪能会适意？多数房间天冷见勿得日头，天热像只蒸笼，人轧人外加来得龌龊，住了迭种“鸽子笼”里向个房客日脚当然勿好过。滑稽个是，真正借出房子个大房东反而呒没捞到啥好处，油水统统拨二房东揩去了。直到解放初期，江苏路一幢二上二下个石库门房子，月租为旧人民币3万块，而占据1/4面积个房客要交3.8万块个房钿。邻近一幢同类房屋，大房东租金也是3万块，但二房东定规要住了亭子间里个三房客出4万元房钿。二房东勿但自家免费白住，还好赚上一票，真正是空麻袋背米！

　　有道是贪心勿足蛇吞象。为仔逼原来房客滚蛋腾出房间高价转租，“二房东”是样样侪做得出。一个开棺材店个二房东为了逼迫房客迁让，竟然带了十几个人，拿8口棺材抬进房里，第二天又抬进去三口；另外一个二房东为了赶走房客，竟然拿一个生病要死快个小囡放到客房里向。直到小囡死脱交关辰光，也勿收敛，真叫是罪过！

　　“二房东”油水捞足个同时坏事做绝，告咾伊拉垃拉社会上个名声差到极点。当时有人创作了描写社会丑恶势力个《旧上海百丑图》，里向就有一个叼了烟袋，盛气凌人个“二房东”。