搿两日连续高温，天气热得勿得了。勿过坐拉屋里向，吹吹电风扇、孵孵空调、吃吃西瓜搭冷饮，还是蛮适意个。就是坐汽车或者地铁侪有空调，也勿觉着哪能热。想想老早自家垃拉农场里向劳动，垃拉码头浪当装卸工，热天战高温，葛末真个叫辛苦唻！

　　我垃拉农场个辰光，现在想想真个是艰苦，热天更加苦，真个叫吃呒没吃，睏呒没睏。开水每人每天只有一瓶。热天勿够吃，嘴巴干，就只好吃河浜里向个水。拉大【da】田里劳动就吃水沟里向个水。啥个卫生咾啥侪勿管了！天热得吃勿消，中浪向我常常一个人到附近个合隆江去游泳。现在想想老吓人个，自家个胆子也忒大了，假使勿当心出了事体，人也寻勿着了。夜里汏浴呒没浴室，只好到河浜里去汏。结果常常拨蚊子咬得吃勿消，吓得逃回宿舍。夜里睏拉帐子里向闷得勿得了，热得睏勿着。到田里向去劳动也呒没啥个防暑降温措施。顶多一顶草帽、一块毛巾而已。水稻田里个水拨太阳晒得发烫，赤脚下去，只觉着烫脚。拉老猛个太阳下头劳动，汗水溚溚渧，揩也来勿及揩。我还垃拉码头浪向当过装卸工，搿个辰光战高温结棍。虽然码头浪向个劳动是特重体力劳动。但毕竟算是工矿了，条件要比农场好得多了。无论垃拉船舱里向还是垃拉码头浪向，侪有鼓风机打风，还有得吃冷饮水搭仔营养汤。露天作业还有遮阳棚。高温热中心个辰光停止作业，休息。劳动条件比起垃拉农场里向勿晓得要好几化了。但是毕竟是特重体力劳动，拉高温季节还是老辛苦个。记得有一趟，我垃拉船舱里卸进口化肥。二十公斤一包，一次要整整齐齐垃拉网里向叠好四十包吊出舱口。垃拉辣豁豁个太阳下头，搬雪雪白个化肥包子，眼睛也花脱了。结果我热得中暑昏了过去。工友拿我送到卫生室，醒过来休息脱一歇就又到船舱里去做生活了。现在想想搿个辰光真是勿容易。

　　正因为我老早吃过介许多个苦，所以后来碰到个苦侪勿算啥了。