碰着每年个“文化遗产日”，我总归老兴奋个，因为有得交关展馆、博物馆搭故居会得向公众免费开放。今年“文化遗产日”拉海6月9号、10号搿两天。我事先查阅了登垃报纸浪个活动公告。垃拉阿拉爷娘屋里附近个新会路浪，有一个叫“华童公学”个旧址，我还呒没去过，乃末正好趁我去看望爷娘个辰光，到埃搭参观一番。

　　老清早出门，按图索骥七问八寻来到普陀区新会路35号，只看见大门墙浪挂块牌子，是作家余秋雨题写个“新会中学”。门口静悄悄，我朝里向张望，并问门卫：搿搭是华童公学旧址？我拿报纸摊开来拨伊看，伊讲：是个，侬进来参观。大门右手就是一幢红砖头三层楼房。我小心翼翼走进大楼，因为走廊里所有门窗侪紧闭，更呒没人员接待或讲解。我转身跑出去，总算看到一楼外墙浪个铭牌，上面分别列出2006年建筑设计施工该大楼个单位。我不禁奇怪再问门卫：搿搭真个是华童公学旧址？门卫耐心倒蛮好，跟我解释：是老建筑呒没错。2006年是按原样修复个。望着搿幢欧罗巴味道老房子，我觉着有点遗憾，整幢建筑我呒没寻到有关“华童公学”个文字介绍，还铁将军把门。我是乘兴而来扫兴而归，只好回屋里向网上“参观”华童公学了。

　　据讲新会路35号原来叫“薛家花园”，是染料商薛宝润于1934年翻造个。而华童公学创立于1904年，1938年因为校舍垃拉抗战中被毁搬迁到此地。胡适先生20岁辰光曾经垃拉华童公学教过国文。当中还发生过啥个事体，我就勿晓得了，不过我老想晓得个。作为一个有历史意义个保护旧址，为啥勿做得好一眼呢？

　　新会路25号，原华童公学也叫薛家花园，染料商薛宝润建于1933年。华童公学创立于1904年（清光绪三十年），1938年因校舍垃拉抗日战争当中拨毁迁往此处，1943年汪伪政府接管后改名市立模范中学，1945年抗战胜利后更名为晋元中学，后又易名陕北中学，晋元中学迁走后为新会中学。 

　　新会路华童公学旧址原有砖木结构三层大楼两幢，一幢于1992年拆除。现存老大楼建筑面积2682平方米，平面长方形，三段式构图，中间三层，两翼两层，中间主体部分为连续拱券柱廊，带券心石，由九根爱奥尼柱支承。入口突出，拱券门，两侧立塔斯干柱，二三层皆为阳台，中部敞廊，立爱奥尼柱，竖长方窗，灰色窗套，窗下墙有线条和图案，汰石子外墙，窗间墙饰褐色面砖，侧面入口由两根塔斯干柱支承，上有拱券形山花，东西首二层上方双坡顶建筑为后期添加。新会路华童公学旧址2009年6月被公布为第二批普陀区登记不可移动文物。