记得我小辰光，也就是三十多年前，马路浪敲锣打鼓个事体是分分秒秒经常发生个。因为伊个辰光是“国内形势一片大好”，所以经常是“捷报频传”，譬方讲：人造卫星上天啦、万吨巨轮下水啦等等，还有，碰着中央开大会、“最高指示”传达啦，定规要连夜锣鼓家什敲一通；最简单个，大扫除、喷药水灭苍蝇蚊子……里弄里向老伯伯老妈妈像走马灯一样，也要排仔队，边喊口号边敲锣，为爱国卫生造势。搿辰光看闹猛甚至于覅上马路，弄堂里勿是张家就是李家，经常会得有参军啊、退休啊等光荣喜事，有辰光，喧天热闹个锣鼓声听法听法就觉着越敲越近，一记头就冲着侬屋里附近而来——迭个辰光侬会得突然想着：哦，原来贴隔壁邻居个张家姆妈，今朝光荣退休哉！

　　埃个辰光凡是锣鼓敲到家门口个，基本以两桩事体为多：一是家属参军，二是光荣退休。相对讲参军由于政审比较严格，光身体好，成份不好也等于零，告咾一条弄堂难得一遇；倒是光荣退休经常碰着，几乎隔日就有。五六十岁个退休年龄一到，“罄咚哐、罄咚哐”个就帮侬敲上门来。当然，讲起来过程也呒没介简单，伊也自有一套约定俗成个程序。

　　通常来讲，退休前一般应先辣单位里开一个隆重个欢送茶话会，由工会主席主持。部门小个，几乎每个职工侪要挨个发言，讲讲搿日天个“主角”——即将退休个老职工个种种“好话”，回忆一下老同志辣企业里几十年来个“丰功伟绩”，有说有笑，气氛活跃。桌浪向有茶点糖果，辣物资紧缺个年代还是相当吃香个，吃勿光个话，有个职工还可以勿失时机个抓上一两把囥进口袋，带回去拨屋里小人吃吃。茶话会结束就要热情欢送了，搿辰光工会早有安排，手笔大个，一辆大卡车已经整装待发，五六个锣鼓手正跃跃欲试。碰着单位小个，如街道工场之类，派不出车辆，葛末勿要紧，一辆“黄鱼车”总归要安排个。总之，车不论大小，欢送个人群却非常热闹，锣鼓家什敲起来一样震天价响！记得小辰光最欢喜看个就是大卡车浪个专业锣鼓手，同样个欢庆锣鼓，辣伊拉手里花头势特别多，翻飞转身，动作漂亮又气势壮观。而且看热闹个人愈多，锣鼓手就愈卖力，用现在闲话讲，迭个辰光也是难得个一场表演秀呀。

　　即将要进弄堂时，大卡车是开勿进了，欢送个队伍只好安步当车，鱼贯而行。退休者双手捧牢退休证（一般镶了镜框里），胸挂大红花（多为塑料制品），辣大家个簇拥下一路走来，或许还会有人带头喊两句口号或唱一两句歌之类。譬如那首“戴花要戴大红花，骑马要骑千里马，唱歌要唱跃进的歌，听话要听党的话！”尤其传唱一时。词意明白如话，字节铿锵，交关适合广大劳动人民辣迭个场化合唱。

　　革命工作功成身退，所以大张旗鼓广而告之应该也属情理之中。侬看迭个辰光退休者面浪喜气洋洋，眉开眼笑，可见也是发自内心个真开心。就像后首来歌星李春波唱个一样：“干了一辈子的革命工作，也好歇歇啦。”因为当时大家个工资差别勿大，又呒啥奖金，退休后比起在职个人钞票并少勿了多少，所以心态老好，真是一劳永逸。

　　现在多年过去了，想起老早辰光个退休，倒真叫是光荣！尤其是搿种发自真心拼之老命敲出来个锣鼓声，现在是勿可能再听得着了。