两年前,夜报发表了我个文章《我用私房钱买房》,讲个是我十年前买房个故事。当初,老婆一心等拆迁,反对买房,所以,我“贡献”出全部私房铜钿买了房。当初老婆还讲我:“侬个私房铜钿忒多了,今后勿准留,全部要上交!”后来房价“节节高”,老婆懊悔了,伊对我讲:“侬只买一套房子,说明呒没投资意识,假使侬多留一点私房铜钿,多买两套房子,侬就英明伟大了……”
老婆迭个“笑话”拨了我创作个灵感,平常我欢喜改编并演唱沪语歌曲,最近,我来到老城厢老房子,跟老邻居茄山河,心生感慨,情勿自禁唱起了我改编个一首歌《老房子,老邻居》(用《篱笆墙的影子》曲调):
房子还是迭个房子哟,邻居还是迭个邻居,
老房子现在还没拆迁,我来望望老邻居。
对过是小张还是小张,隔壁老王还是老王,
伊拉讲我有眼光,抛脱股票买了商品房。啊,
十几年之前廿几万一套房,十几年之前廿几万一套房,
后来升值到一百多万两百多万勿断往上涨。
老婆讲我没眼光哟,勿会投资理财伊讲,
假使当初多买几套房,亲戚里向可以称王。
我讲做人啊心要平,勿要老是想称王,
希望小张还有老王,早点住上经济适用房。啊,
告别那拎马桶还有倒痰盂,告别那拎马桶还有倒痰盂,
一道搬进那煤卫独用煤卫独用的新公房。啊……