前些天读了本版阿仁先生写个《咪咪老酒和扳扳老酒》，有一眼同感，勾起了老底子酒店个回忆，蛮有味道个。老底子勒辣上海个酒店邪气邪气多，小酒店可以讲星罗棋布。譬如讲大一点个酒店，除了淮海路浪个茅万茂，有名气个还有南京路浪个王三和，福州路浪个王宝和、高长兴（高长兴原先就辣上海旧书店迭个位置，后来关门，分店设辣延安东路云南路口搭仔复兴路靠近吉安路浪两爿），以及河南中路南京路口个善源泰等等。听老先生讲，勒辣方浜西路西藏路口有一爿老酒店，店名交关风雅，叫“醉不归”；勒辣建国东路，荣金大戏院（后改为建国电影院）隔壁有一爿老酒点，店名记不得了，店里还竖起一块匾牌，叫“太白遗风”。

　　上海人吃老酒讲法蛮多，喫老酒、嗒老酒、咪老酒、喝老酒。讲到扳扳老酒，搿是近二三十年搿个讲法，大多数是做小生意，打桩模子一干人个切口。

　　老酒店是市民休憩消闲，凑凑闹猛个场所，各种各样个人都有，工人农夫、知识分子、小老板、生意人，公务人员、作家、书画家等等，勒辣搿搭讲讲张、拉拉家常、吹吹牛（勿是说谎话），交流各种信息，所谓“一杯在手，宠辱皆忘”，至于茄山河是现在个讲法。

　　老酒店里个故事实在忒多了，有机会可以请一眼老前辈多讲讲，也算留下一点老上海记忆。一位老前辈讲，老底子到酒店吃老酒真写意，大（dhu）酒店像王宝和，有冷盆有热炒，还可以叫跑堂到外面饭店订菜水，可以讲服务到家了。等到结账时，吃客会从袋袋里摸出一本褶子，取下套子交拨跑堂，跑堂辣账台对账房先生高喊：“雷先生花雕四斤———”老吃客雷先生掼派头答道：“写五斤。”迭个一斤花雕钿就算小账了，到号头浪一趸（den)当会钞。迭个褶子就是现在信用卡个雏形，勿单单有钱人，一般职员也有，小时候辣抽屉里发现父亲也有，蓝色个套子，外蓝里白个褶子，拉开来像手风琴。

　　还有一只故事我终身难忘。“文革”中，大小老酒店关个关、停个停，即使开了也大大缩水，像王宝和也勒出一块店堂供应堂吃，二三楼都停业。勿要说热炒，冷盆也只有几种。有一次笔者等几个小年青到南京路上个新建酒店（就是老底子个王三和酒店）小聚。正好是上半日开门营业，店堂里已有酒客勒辣小酌，阿拉几个刚刚坐下来，看见扶梯浪走下来一个店员，手里拿仔一本“红宝书”。酒客见了统统起身，阿拉也莫名其妙站了起来。只见迭个店员翻开“红宝书”朗读起来：“我们来自五湖四海，为了一个共同的革命目标走到一起来了……”吃老酒还要读语录？阿拉几个也只好跟着念，朗读声勒辣酒店回荡。四十多年过去了，有时想起来就像昨日一样。

　　现在上海滩浪传统个老酒店一爿也呒没了，市民少了一个散心休闲个地方，也少了一个市井景观，勿晓得阿是一个遗憾。