张行是啥人啦？有交关歌迷还记得伊，因为伊是上海走出去个歌手。老早底行【hang】卡带个辰光，屋里向侪是伊个歌，马路浪向拎个四喇叭也侪放伊唱个歌。其实张行代表了一个时代个符号。现在再听伊唱个歌，赛过有让阿拉回到了身穿喇叭裤、手拎四喇叭、弄堂吉他宰歌个光景。张行可以讲是上个世纪80年代家喻户晓个流行歌曲个代表人物。

　　迭位从无师自通个歌手，从荣获上海首届青年吉他大奖赛一等奖之后，伊以轻松、舒展、温馨、互动个演唱方式影响了一代人，垃拉当时对流行歌坛产生了邪气大个影响。张行演唱每一首歌侪有伊个“张氏曲风”，有快有慢、有紧有松、有高有低、有强有弱。创下了搿个辰光交关个人记录，只要是伊个磁带来勿及销，中唱厂个车间加班加点，有辰光歌迷买到个磁带封面浪浆糊一时浪向还干勿脱，可想而知伊红到啥个程度！伊几经风雨仍旧坚持追求着伊心爱个歌唱事业，伊北漂二十多年，事实浪向伊个歌，既呒没拨拉“黄土之风”吹脱；也呒没拨拉震耳欲聋个“摇滚乐队”刮倒，伊靠实力赢得了粉丝个掌声！伊垃拉北京搭央视合作《同一首歌》个辰光，既担任音乐总监又担任策划，拿自家个音乐功底侪发挥出来了，伊先后邀请齐秦、齐豫、姜育恒、童安格、蔡琴、费玉清等一线明星垃拉《同一首歌》同台亮相，一道到美国、加拿大、澳大利亚等华人地区演唱，推动了海峡两岸文化交流，并成功个拿中国音乐、通俗歌曲、民间歌舞样式推向世界。迭趟伊怀了感恩之心回到故居上海，将垃2012年1月17日夜里向垃拉上海大舞台，举办《迎新年，张行个人演唱会》，伊针对上海歌迷个胃口，向阿拉上海人奉献一台看来迟到又勿迟到个经典老歌；搭上海粉丝回眸搭仔分享伊美妙个歌声。

　　张行面对人生个挫折，会对老天呐喊：上帝告诉我，侬心里个小秘密，哪能做到勿要向失败低头，迭种心情足以表明：成功个路勿止是一条。为了伊欢喜个唱歌事业，继续伊个青春个奔跑，勿折勿挠……