阿拉小辰光读书呒没像现在介紧张，功课也呒没像现在多得热昏。到了礼拜天，有辰光去龙华白相。阿拉屋里向离龙华勿算远，走走只消半个钟头。龙华机场旁边有条蛮宽个河浜直通黄浦江。河浜浪向有座铺辣海铁轨个水泥桥，阿拉经常辣桥堍边头等火车轰隆隆开过，也伸长头颈巴望机场里有勿有飞机起飞降落。看火车看飞机辣拉阿拉小辰光侪是交关扎劲个事体。 

　　过了桥，紧贴机场河沿朝东几百米，就到了黄浦江边。迭个地方江水清清爽爽，也难板看见船开过。辣拉夏天，阿拉一帮十几岁个小赤佬就辣江边汏冷水浴。黄浦江勿像游泳池要买门票，也呒没人管。游泳池里人一多，碍手碍脚交关勿适意。迭个地方海阔天空，水性好个可以游到对岸浦东去，水性蹩脚个就辣拉江边浅水地方扑腾扑腾。阿拉辣拉水里白相得吃力了，侪爬上木筏子歇一歇。江边有一排排木筏子。后来听人讲，来潮头辰光，木筏下面有死人氽出来，心里向交关吓丝丝。吓归吓，冷水浴照汏勿误。 

　　龙华镇浪有座龙华塔，古色古香，最初辰光是三国东吴建造个，后来火烧了，重新造起。老底子侬立拉塔浪，可以望得见黄浦江。龙华塔北面辣拉马路对面，有座龙华庙，年代也交关长。上个世纪三年自然灾害辰光，阿拉屋里向养了几只兔子，礼拜天阿拉拎只竹篮头，跑到龙华附近河浜边割青草。阿拉割好草，喜欢到庙里向去坐坐。庙里向勿售门票，也勿像现在香客人轧人多得造反，一年到头冷冷清清，连和尚个人影子也呒没。阿拉亲眼看见四大金刚身浪彩塑落脱勿少，露出烂泥脱稻草，真实做梦想勿到威风凛凛个四大金刚侪是用烂泥稻草做个。辣拉庙里向东北角有个花圃，种植了几株百年牡丹咾啥，迭个辰光老百姓饭也吃勿饱，哪有心思去看花？ 

　　只要袋袋里向有角把钞票搭仔几两粮票，阿拉一出龙华庙，馋唠虫就出来了，跑到对面镇浪一爿饮食店买只油墩子吃吃。油墩子五分钞票、一两粮票一只，外面糯米团，里向包个豆沙，氽得金黄油亮，咬一口，香喷喷，糯嗒嗒，交关好吃。几十年过去了，阿拉已经满头花甲一把年纪了，还呒没忘记小辰光辣拉龙华吃个油墩子。