勿要看搿歇辰光马路浪汽车、摩托车、助动车多得一天世界，勒垃三、四十年前侪是脚踏车撑场面。上班族除脱步行搭仔乘公交车外，脚踏车是主要个交通工具。

　　当年我分配到徐汇区一家副食品工场做生活，从屋里向到单位有两站路。姆妈看我走路勿便当，弄到一张脚踏车票，买了部28英寸凤凰牌拨我踏。迭部脚踏车价钿一百廿八块，搿个辰光是一笔勿小个数目。小青工满师后月收入三十六块洋钿，要买一辆脚踏车，牙齿缝里得省个一年半截。勿过闲话讲回来，小青年有了块上海牌全钢手表搭仔一辆赤刮勒新个脚踏车，走起路来也神抖抖。

　　小辰光，我去外滩看轮船，到龙华去白相，侪是靠11路电车（两只脚）。搿歇好了，脚踏车一踏，快得像一阵风。我踏脚踏车有点投五投六，有一趟，勒垃金陵东路马路浪，一勿小心车轮盘轧进2路有轨电车个轨道里向，钢圈边上个克罗米也擦脱了，还好额角头高，人呒没掼疼。俗话讲：用仔爷娘铜钿勿肉麻【心疼】。迭部脚踏车虽然是我唯一个高档物事，我个派头也勿是一眼眼小，有熟人开口借，呒没一趟回头过。搿个辰光国产脚踏车质量好，市面上最吃香个是一种车架子用锰钢做个13型，邪气结棍，勿过迭种车子交关难买。我迭辆凤凰牌普通车也勿推板，车架子敲敲当当响，也蛮吃重。有几趟车架子浪前后各坐一个，我踏仔两个大人照样跑。我寻开心讲：可以踏两只大猪猡了。

　　我踏仔迭辆车子跑了上海勿少个闹猛所在：城隍庙呀南京路呀老西门呀静安寺呀西郊公园呀。热天介夜里向，有辰光想吃杯赤豆刨冰或者冰淇淋橘子汁咾啥，豪燥跳上车子，从肇嘉浜宛平路踏到淮海中路。我也踏仔车子到南翔、青浦朱家角兜白相。最远一趟是去海门外婆家，勿过我呒没本事踏仔车子横渡长江，是多买了一张船票，连人带车搭船去个。后首我考进了上海西南角子个一所师范学院，开头半年走读，也是靠迭部脚踏车来来回回望学堂里脱屋里向两头跑，省了交关辰光。

　　我迭部28英寸凤凰牌脚踏车踏仔十几年，变成了一部老坦克。人总有一种喜新厌旧个坏毛病。我眼热人家踏轻便车，也买了部26英寸个永久牌，老坦克就囥拉单位个车棚里向。日脚长了，车身上侪是灰尘，我懒得去揩。如果摆到搿歇个话，勿是吹牛皮，迭部老坦克只要打足气，照样跑得邪气快。