阿拉小个辰光，我记得马路浪老是要发大水。特别记得最清爽个是长乐路浪个大水，雨勿落了，水还一时退勿下去。我爸爸搭妈妈就抱阿拉坐辣一部双人藤坐车浪，再拿坐车摆辣一只汏浴个木圆盆里向，伊拉立勒上街沿，乃末一把拿阿拉推到大水里，迭张是我弟弟一个人坐辣坐车里向。

　　这部坐车可以坐两个人，当中有一块藤板牵牢，我搭妹妹经常一道坐勒坐车两头吃饭，有辰光大人就推阿拉出去白相。这部坐车还可以拿脱当中个小藤板，摆一块长方形个大藤板搁勒座位浪，小人就可以睏觉了。

　　讲起发大水，还有一段笑话要讲：我还有个大表哥住勒苏州木渎三塘街，我个大姨姆妈常常要叫伊拉儿子送点苏州特产来拨阿拉吃，大表哥每趟来侪要讲鬼故事拨阿拉听，吓得阿拉大家哇啦哇啦乱叫，夜里连觉也睏勿好，会做恶梦。但是下趟还是想等伊来，因为伊来了既有好物事吃，还可以听到新个更加刺激个鬼故事。有一趟大表哥一进门就大叫娘姨妹妹（苏州人叫姆妈个妹妹），我姆妈一开大门，大家只看到一只标准个落汤鸡：头发溚溚渧，右手一只毛完全湿个鸡、左手一捆呒没泥个藕。再一看他浑身倒侪是泥。伊讲勿得了了，伊落到大水管道里了，好勿容易爬了出来，推扳点命也呒没了。就是因为长乐路经常发大水，政府再下决心要修马路，刚开挖了旧管道，还呒没来得及调好新个排水管就落起了暴雨，路浪向看勿出阿里搭是路，阿里搭是坑，外头来个人，况且还是小囡家哪能晓得会上当，一穿马路就落到了管道里。 

　　搿条马路后来又修了好几次，现在总算侪修好了，再也勿会发大水了。现在长乐路照片浪向搿种场景再也看勿到，是高档住宅区了。