第六十期题目

　　上海闲话里向，有得交关拿动物打比方个词语搭仔句子，邪气生动有趣。下面是老读者杨保飞先生讲个几个句子，侬还讲得出啥个搭动物有关个词语。

　　答题请寄

　　威海路755号新民晚报活动专版部“上海闲话”栏目收  邮编200041 E-mail：lvz@wxjt.com.cn

　　黄牛肩胛——老黄牛个体型老大个，勿过伊呒没肩胛个，牛头直接连牢仔牛身体。比喻一个人勿敢承担责任，赛过是“黄牛肩胛”。

　　黄鱼脑子——黄鱼个脑子是两块白颜色个小石头。比喻一个人勿动脑筋，比喻迭个人老笨个，就讲伊是“黄鱼脑子”。

　　缩头乌龟——乌龟只要受到一眼眼惊吓，伊个头马上会得缩到乌龟壳里向去，外加要过交关辰光，等伊觉着危险已经过去了，伊个头才会得慢慢叫个再伸出来。用“缩头乌龟”来形容胆小怕事、呒没一眼眼血气个人老确切个。

　　呒头苍蝇——掐脱头个苍蝇，翅膀还会得扑腾扑腾，勿过飞起来完全呒没方向。比喻一个人做事体方向不明、呒没计划，东打一拳、西踢一脚，就像“呒头苍蝇”一样。

　　蓬头狮子——想一想雄性狮子竖起来个一头毛发蓬蓬松松，用伊来形容一个人头发、胡子又长又乱，就像一头雄狮子，蛮形象个。

　　老虫做亲——“老虫”就是老鼠。搿种动物日里向一般勿大出来活动个，葛末到仔夜里向，就侪是伊拉个市面了。“老虫做亲”，通常就是指深更半夜个辰光忙煞。

　　老虎脚爪——巴掌打人老结棍个，叫请侬吃“老虎脚爪”。不过，还有一种传统早点，也叫“老虎脚爪”，因为伊个外形有眼像老虎个脚爪。

　　鸡狗鸡狗——当象声词来讲，就好比“叽咯叽咯”，而十二生肖当中，据说“鸡”和“狗”是“相冲”个，鸡狗碰垃一道就“鸡狗鸡狗”搞勿清爽哉！

　　蚊子结——“蚊子结”专门用来指一种邪气细小个接头，譬如，垃拉纺织厂里纱线、毛线打结头侪是用“蚊子结”个，搿种接头，勿但接头个外形细小，外加交关牢靠，勿会松脱个。

　　鸡爪疯——侬看看鸡个爪子，永远捏勿起拳头来，一个人个手，假使手节头侪像鸡个爪子一样撑开来，抖抖索索个，啊是标标准准个戆大啦？ 

　　猪头三——通常用“猪头三”来形容“七勿老起、说话勿像”，“脚高脚低、呒重呒轻”个人，有眼“捧勿起个刘阿斗”个意思。

　　马屁拍垃马脚浪——想拍马屁，却拍到仔马个脚浪向去了，拨马狠狠个踢一脚。

　　黄鳝身体滴滴滑——用手是老难捏牢一条滑溜溜个黄鳝个。形容一个人油滑到仔极顶了，就像一条黄鳝，啥人也捏勿牢伊个，捉勿牢伊个任何把柄。