假使讲上海女人有一百个优雅值得称颂，假使讲上海女人有一百个妩媚值得嫉妒，葛末上海女人至少有一个缺点，至少有一个勿能忍受个低俗，足以减去九十九个优雅，减去九十九个妩媚，搿个就是上海女人穿了睡衣满街跑，只要是垃拉夏天，甚至也包括晚春搭初秋，迭个一身上下个睏衣就是上海女人个标准服装了：白底子、酱红或者宝蓝或者土黄个小花，袖口搭下摆镶了一圈深色个滚边，上衣有袋，裤子也有插袋，考究个做工绝勿是自家缝纫机踏出来个。

　　虽然并勿是每一个上海女人侪穿睏衣上马路，并且还是有交关上海女人就极其看勿惯穿了睡衣上马路个上海女人，但是这笔账就算垃拉上海女人头浪了，成为上海女人个一个话题。市井文化有市井文化个肤浅搭理由，睡衣也是迭能个。其实对睏衣女人个议论，侪呒没弄清爽为啥穿睏衣上马路，伊拉夜到头睡觉穿个睏衣，是简单个汗衫短裤，考究个睏衣伊拉是勿舍得睏觉穿个；伊拉认为上街个睏衣勿是睏衣。有一个事实可以证明伊拉个讲法，伊拉白天穿睏衣个辰光，里向是戴胸罩穿内裤个，夜到睏觉辰光穿个睏衣短裤里向是真空个。按照某一位爱穿睏衣上街个女人个讲法，衣裳里向戴胸罩穿内裤个，就勿是睏衣。好像也有道理？

　　伊拉居住空间极其狭小，夏天介里伊拉从房间到厨房再到卫生间勿晓得要走多少趟，勿像独门独户个主妇，甚至可以做裸体家务。她们呒没搿个福气，当然要有一套可以走来走去个还可以做家务个衣裳。伊拉觉得睡衣还真是蛮大方的，该遮牢个部位全部遮牢了，还邪气宽松风凉，垃拉充斥着男男女女邻居个公用场所，也老自然个。睏衣居然上下有衣袋。要晓得夏天女人上街最烦个是啥？是一身上下呒没一个袋袋，而睏衣个衣袋恰恰又促使了女人穿了伊上马路，一边袋袋里放点小钞票癞头分，一边袋袋里塞只马甲袋，去菜场就方便了。就是垃拉屋里，睏衣个袋袋也有实际用场，比方讲摆一只一次性打火机到厨房间点煤气用，比如讲掼一串钥匙回房间个辰光用，比如讲摆几张手纸去公用卫生间就急。呒没住过公用住房个人，根本勿晓得迭些鸡零狗碎个重要性。对于伊拉来讲，睏衣就是白天居家生活做家务个工作服，两套睏衣调上调下，每日洗一把，用衣架㫰得服服帖帖；穿垃身浪还真蛮好看个。如果有人跟伊拉讲睏衣勿文明，伊拉会反唇相讥：侬帮帮忙，我穿了介许多衣裳还勿文明啊？难道还是穿吊带衫文明？存在决定意识，垃拉啥个辰光侪是一定个。