上海人，辣“海纳百川、有容乃大”个海派文化熏陶下面，思维活跃，锐意创新，表现辣造词浪向，充满海派个奇思遐想。阿拉从三个时间段来看上海人用词风格个领异标新。

　　上海闲话当中利用比喻、借代、双关、通感咾啥构成个词语比比皆是，继承弘扬了一大批表现江南文化个吴语生动词语，像“珍珠米、荷包蛋、鸡毛菜、粽子糖、瓦爿饼、芋艿头、和尚头、板刷头、田螺眼、兰花节头、黄鱼脑子、黄牛肩胛、蜡烛包、橡皮泥、海瓜子、烫山芋（棘手的事）、牛踏扁(一种大而扁的菜豆)、叫哥哥(蝈蝈)、鸳鸯(东西不相同而配成一对)、老爷(质差,碰不得)、奶油(可爱,讨人欢喜)、贴肉（十分亲热）、跷跷板（摆不平）、磨光石卵子（圆滑）等等，连称颜色也有“铁锈红、咸菜绿、香烟灰”。

　　到上海开埠以后，大批新鲜活泼个词语从民间勿断产生出来。像额上个皱纹叫“电车路”；步行，叫乘“十一路电车”，说话离题漫无边际，叫“开无轨电车”；光头，叫“电灯泡”。还有“照会（面貌）、薄脆(一种饼) 、咬耳朵(凑近耳边说秘密)、吃萝卜干(手指关节被击扭伤)、拆烂污(做事不负责任)、放白鸽（失约）、隔枪篱(夹在中间受挫)、打电报(眉目传情)、翻门槛（变换各种窍门）、睏扁头（异想天开）、热大头昏（想入非非）、轧扁头（被搞得焦头烂额）、新开豆腐店(新开张)、橡皮饭碗(不会失业的职业)、空心汤团(不能兑现的许诺)”。有能力，朋友多，好办事叫“兜得转”、“搞得定”、“吃得开”。还有“搭架子、收骨头、牵头皮”等等惯用语，对生活个方方面面有老大个概括力。

　　利用谐音或和韵也能使语言生动活泼,像故意用反话触人个霉头，称“厾煤球”；讨厌人话多,讲伊“烦得像饭泡粥”；勿欢喜对方胡搅蛮缠，就讲“侬来搅啥个百叶结!”

　　用点噱头闲话去叫人家“十三点”，叫伊“十一点八刻”，又叫“B拆开”；形容一个人立得笔直头歪辣海，叫“六点零五分”；称“搓麻将”叫“学习144号文件”。 

　　夸张起来，也是无边无际。譬如形容感觉浪向辰光老长，讲等侬等仔“半半六十日”；形容遥遥无期，讲“开年礼拜九”。一个人拨别人搞得昏天黑地个辰光，伊讲：我现在已经拨侬搞得“五荤六素、七丁八倒、七支八搭、搞七廿三”，弄得“投五投六、六神无主、半死半活、死蟹一只”啦！ 

　　极言倒霉，讲“霉头触到哈尔滨”；极言不顺利,可讲“碰着七十二个大头鬼”；极言变化之快,讲“眼睛一眨霎,老母鸡变鸭”；极言精明之甚,叫“门槛精到九十六”；极言侥幸到头,讲“额角头碰着天花板”；极言折本，讲“赔账吃到南天门”。

　　直到现在个80后，活跃个思维仍旧催生了交关新流行语。“根号3”，称身材欠高个男生；换话题叫“调频道”；“侬死机啦！”是对某个处于发呆状态人个质疑；“兼容机”则用来喻指谈三角恋个人；“绝代佳人”趣指结婚不要小孩个自由女性；讽刺离过多次婚个女人，讲伊“前公（功）尽弃”，祝伊再结（接）再离（厉）”。“接了张罚款单”指收到了一张婚宴请柬；叫伊“3.72平方”，就是“十三点、不三不四”。“通心粉”指虚有其表呒没内涵个人；“鬼摸大蒜头”，指乱来个无厘头。十足幽默戏言，依然表现出搿个大都市语言个灵动。