新年里上海个马路浪空空荡荡。街沿浪看勿到有几个人，马路浪看勿到有几部车。小商店都关门了，小饭店都打烊了。只有星星点点个几爿连锁小超市因为“年中无休”还开着。公交车开来开去，呒没几个乘客，形同空车。地铁里人人可以享受座位。打的一点都勿难，只要侬举手扬招，常常是几部叉头为抢一笔生意开足了马力杀过来。上海人到啥地方去了？勿论侬是老上海、新上海。叉头司机最有发言权。伊拉是上海滩浪个市容观察员、行情分析师。我打的，只要司机也有谈兴，一定要搭伊拉攀谈攀谈。为啥新年新势里上海空荡荡，坐一趟叉头就可以得到一个答案。

　　“正宗个上海人、老上海人有勿勿少少出门去白相哉。节前阿拉送机场、送火车站、送长途客运站个生活最多最忙。节后又拉伊拉回屋里向。再讲现在个上海人一家门里有一部、两部车子个也不稀奇，加上高速公路又勿收关卡钞票，大家开了车子跑短途、跑长途个积极性勿要太高噢。上海人、上海车子都跑脱了，上海当然要出空了！”叉头司机是个开出租车廿多年个老师傅，伊还补充评论讲：“出门个朋友算盘还拨得勿精。卖路钿是省脱了，但外地景点、宾馆、饭店个费用都辣长假里淘浆糊涨价了。一进一出还是吃亏个！”

　　“侬看看马路浪外地牌照个车子还剩多少？”一位崇明人叉头师傅是搿样分析个，“外地车子、外地人都回老家去探亲了。外地朋友、新个上海人现在勿比老上海人少。我平常拉客头至少有三四成是做伊拉个生意。伊拉到上海人生地勿熟，打的等于寻了一个免费导游。伊拉一走脱，阿拉个生意就吃勿饱了。侬看，到了夜里七、八点钟，我个本钿还差了交关呢！”还是一位崇明师傅讲：“上海人喊叉头，要么是2号线地铁口，要么是8号线地铁口，到浦东浦西都去换乘地铁了。上海人做人家，派头太小！”

　　绝大多数个师傅认为上海马路浪人少、车少是属于勿正常状况。“正常个情况是车多、人多。高架浪堵，高架下也堵。大马路轧，小马路也轧。像现在个辰光是平常个高峰辰光，开了车子跑得就比电瓶车快一点点。侬看看路码表，阿拉现在跑多快，连生手、戆大也可以跑个60码！不过，再过几天、过了元宵节就会正常了……”我晓得了，辣大上海，正常个情况是人多、车多、闹猛得一塌糊涂。而反之，就是勿够正常。勿闹猛就是一点也勿正常。朋友，侬欢喜正常还是勿正常呢？