二楼东厢房个李家伯伯李家姆妈是一对恩爱夫妻。讲闲话轻悠悠，出门手牵手，欢喜咸棍掼奶油，伴音带一放，两介头还会得“老相公老娘娘，黄浦江边看龙舟”，真是好透好透。不过，李家伯伯心里向还有勿称心个地方。

　　伊拉两介头老早辣一爿厂一个科室做生活，写字台面对面，侬看我我看侬个辰光比低头做事体个辰光多。日脚一长就自己看对轧朋友了。后头来，工作需要调了部门，仍旧一爿厂个，一道进一道出，吃中饭辣食堂里还要碰头。乃末，初恋、热恋、结婚养小囡，一路里顺顺当当。也正因为搿能介，伊拉从来呒没写过一封情书。李家伯伯想到搿点，总归觉着伊拉个恋爱史浪缺了点啥。

　　李家伯伯退休以后，参加社区个骑游队。第一趟参加活动，是兜上海周边几个江南水乡。伊老开心个，交关人一道踏脚踏车出去白相，想想蛮扎劲。再有，自己从小李到大李再到老李，一生一世呒没写过一封信拨家主婆，搿趟总算有弥补个机会了。第一天一到宿地，伊就搭屋里写信。到底是坐办公室个，文化人，再讲一路踏过来，已经打好腹稿，一歇歇信写好了。路浪风光一笔带过，着重倾诉三十几年来对家主婆个爱恋。赶辣小镇邮局打烊前头，伊拿信寄脱。伊想象得出，家主婆收到搿封迟到个情书，会得哪能介意外，哪能介激动。

　　七天后，李家伯伯转来了。咦？老太婆哪能呒没反应个？弄勿懂了。吃夜饭个辰光，李家姆妈辣陌生头讲：“噢，有侬个信，辣夜壶箱抽斗里。”李家伯伯拿出信。信壳仍旧封辣海，上头是自己个笔迹，写个是自己个名字。

　　伊戆脱了。