世界杯搭啥人搭界？上海闲话“搭界”，普通话就是有关、有关系。“搭侬搭界”和“搭我勿搭界”是上海人常常挂辣嘴边个一句闲话。与世界杯搭界个当然是男人。“足球，让女人走开！”搿句闲话是天底下所有男人辣世界杯开打之后要祭起来个咒语。不过现在勿太灵光了。女人也有了伊拉个世界杯，女子足球也已经风行天下了。中国女足被奉为铿锵玫瑰，数次打进世界杯，还拿过一次亚军。上个月中国女足以亚洲杯季军个身份又取得了下届世界杯个参赛资格。中国男人有点鸭屎臭；只轧进了一趟韩日世界杯，小组赛一场勿胜、一分勿得、一球勿进，捧了鸭蛋卷铺盖走人。中国男人想进世界杯至少要等到2022年。因此，中国女人可以老骄傲老神气个讲：“世界杯，让阿拉个男人走开！请大家孵辣屋里向，汏菜、烧饭、晒被头、看电视……”

　　踢足球个男人出勿了国门，教足球个男人还有机会。每当世界杯大战，足协总是会组织国内个教练去观战取经。记得法国世界杯，国字号教练和当时个甲A主帅们组团去，我也跟了伊拉好一阵。伊拉进了球场只好搭普通球迷一式一样爬上观众看台。国家队主帅戚务生因为痛失出线权，被球迷起了绰号“泣无声”。伊辣90分钟里一语不发闷头看球。中场休息，伊迓到看台下角落里低头抽烟。作孽煞脱了。我为此写了《看台上的戚务生》，哀其不幸。让我气勿过个是，几个甲A教练辣看球辰光还骂山门：“我看世界杯水平也搭浆，与阿拉国内联赛差勿多！”顾及伊拉面子，我呒没记下来发稿。去西天勿取真经，还以为天下老子第一。世界杯真个还与搿点勿思进取个土帅混身搭勿上界个。

　　国内球迷还是千方百计个去轧每一届世界杯闹猛个。尽管侬花了交关铜钿银子，吃了千辛万苦赶到世界杯主办国，但侬马上会感到侬只是一个局外人。参赛个32强球迷们披国旗、唱国歌、又喊又叫、又舞又跳，因为场上有伊拉个子弟兵。而阿拉呒没，所以呒没一点可以兴高采烈个娱乐动机。侬常常会被人当作韩国人、日本人。就是侬表白了自家个身份，大多数个外国球迷会感到吃惊：“中国人？这一届世界杯有你们什么事？没想到！”当然，天下球迷是一家。侬会被邀请到伊拉个狂欢节目里去。但是，当侬也又蹦又跳个辰光，侬会闪过搿样个一个念头：“搭我搭啥个界？……”瞎起劲！