一根绳子大约莫有两尺五寸长，

　　打仔结头我搭侬来白相挑绷绷，

　　小指末头轻轻勾起绳子当中央，

　　趴开虎口翻落转上大家调花样。

　　我翻一枚大五角星做个好学生，

　　侬翻一只高音喇叭可惜吹勿响，

　　我翻一朵双十字花闻闻交关香， 

　　侬翻一顶小降落伞样子邪气像。

　　想起阿奶关照挑绷辰光不好长，

　　掼脱绳子推开窗门头颈朝天张，

　　明明天浪高高挂了一轮红太阳，

　　原来传说挑绷落雨侪是讲白相。