伲浦东原居住地老房子动迁。民工开拆前，居然勒一间破旧个房子里扛出一块匾。迭座歪歪倒倒个旧房子，矮小木柱，碌砖墙壁，灰黑瓦爿，堆满杂物，无人居住，主人早就移居美国去了。翻出个搿块老物事，上有“洪记豆腐老店”六个字，落款年份是光绪某年。移居美国个豆腐店主人，都叫伊“小洪”，我搭伊非常熟悉。

　　1963年，我考进地方上还算有名个一所初中，伲爷为此订了份《少年文艺》。长我十多岁个小洪晓得了，每个月里有几天，伊就勒豆腐店摊头上特别注意邮递员，头一个跑来借。有辰光会半路拦牢邮递员，拿《少年文艺》迅速看完再还拨我。

　　豆腐店真正个老板是小洪个老爹老洪搭伊爷大洪；小洪其实是小开，很小就呒没了娘。五十年代末个一个早晨，大洪脑溢血去世，小洪含泪顶上。

　　伲镇，当时还呒没接上电。吃过夜饭，天就黑落下来。屋里点上煤油灯，灯芯一圈是亮个，幽幽个光，大概只能照出尺把。八仙桌以外，漆黑一团。要走动，得把煤油灯擎勒手里。豆腐作坊，至少点了七八盏煤油灯，亮堂堂个。一年到头，豆腐店里好像总是闷热个夏天，从来呒没春天、秋天和冬天。小洪搭两个工人总是赤膊，头上汗，一甩一大把。

　　看小洪做豆腐，真个是劲头十足惊心动魄。

　　小洪肌肉凸出，伊勿是走路，而是蹦！地上淌满酸叽叽个污水，一只只木桶眼花缭乱个飞来飞去，从一只手臂，快速个拎到另一只手臂。热气从豆腐作坊四周墙上大窗框往外冒，好像汏浴个混堂。

　　作坊里右边是石磨，比八仙桌还大。推磨必须脚步勿停，脚下就一路飞出水花。每转一圈，还要眼明手快，赶紧往石磨孔里加一勺泡胀个黄豆，再跟进一勺水。旁人往往看得发呆。小洪也有搿种本事。小洪勿但同样奔、同样加黄豆加水，还眼观六路，耳听八方，勿断发命令：“当心豆浆潽！勿要柴火了！”“撇沫！”

　　浓浓白白厚笃笃个豆汁，汩汩个勒粗糙个磨盘缝里流出，永勿停歇个磨盘，转得连看个人都会头昏。比磨盘更大个铁锅一带，白乎乎个水汽遮得对面看勿见人。工人赤膊，挥着三四尺长个粗“筷子”，居然能从根本看勿出啥名堂个豆浆表面，小心翼翼个捞出一张又一张豆腐衣。像变戏法。小洪脚压牢杠杆一头，手吊勒半人高个木框上，杠杆压着木头——有辰光干脆压着石头，把豆腐里个水沥出来。

　　小洪伊拉跳动得实在太结棍，以至油灯个灯焰也跳起舞来！豆腐作坊里七八盏煤油灯个灯焰，勒拉我个印象里，从来就呒没过安稳个辰光。

　　小洪作为豆腐店最后一代，拿店关掉是勒拉“文革”里。

　　本来，“豆腐店小开”成分，不过是“小业主”档次，勿算太要紧。但小洪太惹眼，伊是镇上个名人。一，伊喜欢拉二胡；喜欢拉勿算，还引了敲扬琴个、弹琵琶个……六七个淘伴，坐勒店门外弄“江南丝竹”，煤油灯旁飞着一团团个蚊子和小虫。后来有了路灯，就转移到路灯下面。二，伊又全镇独个，买了手摇留声机，一大叠黑胶唱片，夏天乘凉时咿咿呀呀个放。伲拿凳子坐到留声机边上，看漂亮个唱片转，看针尖移来移去，喇叭花形状个喇叭里，好听个声音就出来了。迭辰光小洪最开心。

　　“文革”一来，“封资修”帽子勿偏勿倚个落到小洪头上。唱机拨没收，唱片统统被砸烂，伊个豆腐店矮阁楼，被抄家得一清二白。后来，豆腐店关门，小洪进了里弄加工组。

　　上世纪80年代改革开放，小洪个娘舅，勒拉美国开业个牙科医生，回来探亲，心里挂念豆腐店。看到小洪贫民一个，单身一人，就办齐手续拿伊带往美国。小洪锁上豆腐店木头门，再将门和窗户钉牢，走了。