小暑大暑，上蒸下煮；

　　望伊落雨，树下坐坐。

　　大暑之后，一年当中顶顶热呃辰光到了，看看“暑”字，汗就已经一身了：上头一个日，下头一个日，人赛过就夹勒当中蒸桑拿，所以，现在也有交关人叫搿种天是桑拿天。

　　日脚难过。不过，哪怕再难过，日脚还是要过个。其实，乐观想想，一塌刮之也就15天，再以5天为一个单位，捺伊拆成三段：

　　第一段：腐草为荧。古人蛮有意思，伊拉认为，青草腐烂以后会变成荧火虫，而荧火虫又是迎接立秋呃诗意之虫；所以，搿歇辰光有一桩有趣呃事体好做呃，就是约三两好友，到山里去住脱两夜，去体会一记“轻罗小扇扑流荧”呃浪漫。而且，当侬跟牢仔荧火虫勒山林里穿来穿去，一阵阵凉风会告诉侬：热天来了，秋天也就勿远了。

　　第二段：土润溽暑。溽是湿，搿种大热天里，人稍许动一动就汗汤汤滴。古人又讲，“心悲物出泪，心愧物出汗”，大约模意思是，心有悲伤，就会落眼泪；心有愧疚，就会出汗。怪勿得会有人讲，侬做啥亏心事啦，额骨头冷汗嗒嗒滴！勿过，到了热天，能够出身汗也是好事体，捺身体里龌龊末事蒸发脱，清清爽爽入秋。

　　第三段：大雨时行。搿歇辰光，阵头雨多起来了，有辰光也就只落三五分钟，树荫下头迓一歇就结束了。不过，人会适意交关。尤其是立秋一到，落一场雨就风凉一眼，一个热天也就过脱了。

　　【沪语解释】

　　一塌刮之：“一共”的意思。汗汤汤滴：大汗淋漓。额骨头：额头。迓一歇：躲一会儿。