我个童年是辣老式弄堂里度过个。既呒没碧绿草坪，也呒没啥游乐设施，只有一小块还算平整个场地，但是左邻右舍个小朋友们还是依靠想象力，创造出不少有趣个游戏。

　　白相最多个游戏是捉迷藏。弄堂里小路弯弯曲曲，四通八达，只要寻一个稍微远一眼个灶披间藏身，或者躲到路边个杂物堆后头，想要捉到人就只好靠碰额骨头，所以大家侪勿愿意去“捉人”。

　　为了游戏能顺利开始，大家不得不用“猜东猜”个方式选出“捉人”个家伙。伊必须先蒙住眼睛从一数到二十，然后再到处去捉人。只要寻到一个人，搿个人就负责下一盘游戏里“捉人”。假使辣辣规定辰光里一个人也寻勿到，就要被“吃排骨”。所谓“吃排骨”就是大家排好队，伸手撑住墙壁，形成一个通道，迭个人弯腰从通道里钻过去，钻个过程中大家可以用两只手往他背上拍，有点像菜场里切排骨个动作，因此得名。

　　假使参加游戏个人比较多，“打仗”游戏邪气受欢迎。先要选出皇帝，这种角色一般由两种人担任，一种是身强体壮，打架中个常胜将军；另一种是家里经济条件勿错，经常能发零食个小富翁。选好了皇帝，就开始分官，一般有一个军师、一个元帅、几个大将，具体名称侪是从评书里听来个，越大越好。分好官，就开始行动，如像现在流行个电脑游戏，皇帝派手下到处搜寻敌人，“敌人”也会组织类似个队伍，一旦双方碰面，就要“厮杀”一番。说是厮杀，其实就是比啥人跑得快。人多个一方追，人少个一方逃回去寻皇帝要援兵，跑得慢个就被对方捉牢，变成俘虏，迭条弄堂也就变成别人个地盘。勿过这种地盘其实呒没啥价值，而且从来勿固定，甚至每个队伍也会因为零食分配等原因分分合合。

　　与现在流行个电脑游戏相比，老弄堂里个游戏呒没绚烂个画面，呒没精彩个背景情节，但跑跑跳跳、吵吵闹闹之间，大家侪白相得邪气开心，还能锻炼身体。

　　假使只有三五个人一道白相，“打弹子”和“拍香烟牌子”就是保留节目。打弹子先要寻一块地方，用砖架一个斜坡。地面平整与否倒勿重要，有点坑洼反而更好，就和高尔夫球场特意修成起起伏状有异曲同工之妙。参加游戏个人让自己个玻璃弹珠从斜坡上滑下去，然后按弹珠滚出去个距离远近排序，依次上场，用自己个弹珠打到别人个弹珠，打中就算赢。

　　拍香烟牌子则不需要什么场地，两个人随便找一个地方就可以玩。我们玩个“香烟牌子”其实和香烟无关，只是画着各种古代英雄个卡片，一般来自零食包装，只是沿用了“香烟牌子”个称谓而已。大家把“英雄卡片”放在一起，然后一人拍一下，手不能碰到卡片。谁把两张都拍得翻转就算赢。

　　后来，弄堂被拆迁了，原地盖起了花园小区。虽然小区不仅有芳草青青，还有漂亮个滑梯秋千，却只有一些“学龄前儿童”偶尔去白相一下，已经上学个小朋友几乎已经与“户外游戏”绝缘了。勿晓得现在个小朋友长大以后，除了埋辣辣纸堆中个回忆，还会有怎样个快乐呢？