阿拉小辰光呒没冰箱，所以大家对冰饮会嘴巴馋。伊个辰光流行个生啤酒倒比现在个瓶装啤酒更加有味道，从营养到口感侪更加好，因为有营养丰富个酵母菌，但是零拷个生啤有一个老大个缺点，就是勿好保存，吃多少买多少，勿好过夜，店里厢是把啤酒装在大个橡木啤酒桶里，蛮考究个。老爸一直讲啤酒就是液体面包，对伊来讲，一天勿吃啤酒勿是就等于呒没吃饭，所以伊个人生辞典里，饭可以勿吃，啤酒是一定要喝个。

　　至于阿拉小人嘛，伊个辰光最流行个是用冰水泡桔子粉，有只牌子叫“果珍”，伊个广告就是姆妈辣广口大杯里泡好果珍，用调羹敲三记杯子叫小人来喝，然后出广告语——“太空时代喝果珍”。因为据说NASA个宇航员也喝果珍个，而且据说NASA官网评出来个“十大太空食品”里果珍排第二位。伊个辰光，迭个广告我老欢喜看个，好像看一遍就吃了一杯一样。后来到NASA去参观个辰光，我还特别留心看有果珍个介绍口伐，结果呒没看到，我还有点失望。不过阿拉小辰光，一般只吃得到普通个桔子粉，而且因为呒没冰箱，冰水是要到冰水站去泡个，四分洋钿一瓶，伊个辰光我和妹妹一人捧一只热水瓶去泡冰水侪觉得老开心个。小辰光就是迭样，有点事体是老简单个，但是也蛮有乐趣个，搿种乐趣和现在小人对着iPad手指头划来划去个乐趣肯定是勿一样个。

　　刨冰是阿拉小辰光个降温神器，现在从台湾流行过来个刨冰花头老透，样子也做得登样，雪花冰绵绵冰水果冰一大堆，色彩老丰富个，不过阿拉小辰光个刨冰呒没介许多花头经，只有一只品种——赤豆刨冰。勿是像现在盛辣大盆子里端上来，侬好慢悠悠吃个，老早是要辣辣店里排长队才买得到。服务员舀两大调羹事先烧好个浓赤豆汤，再拿大冰块放辣碎冰机里绞碎，再用碎冰块填满杯子就好了，杯子呢就是老厚个啤酒杯，再给你个勺，就好去吃了。伊个辰光呒没空调，介许多人挤在店里吃刨冰还是蛮热个，所以大家侪欢喜端着啤酒杯站在店门口吃，一边拌一边吃，老扎劲个。吃个辰光勿好多讲闲话，因为要趁冰完全溶解前就吃到嘴里才更有味道，桂花赤豆汤和碎冰拌辣一道，嚼一嚼就有香甜冰爽个口感了。

　　搿种场景我大了以后碰到过一趟，有趟去英国，正好是周末，晚上有场热门个球赛，大家下班后侪聚到酒吧来，那天几乎所有个酒吧门口侪人手一杯啤酒，聚在一起谈山海经。我立辣马路对面，看到搿个场面就想到小辰光西藏路上个刨冰店，有一点穿越个感觉。区别是人家主要是辣聊天，偶尔喝一口，阿拉是大家侪闷头吃冰块，现在回想起来蛮搞笑个。搿爿店现在已经变成了食品店，我每趟路过总归会多看一眼，好像眼睛多停留一秒钟，就可以看到小辰光个自己一样。

　　对赤豆刨冰我特别有感情，现在个小人考上大学就去毕业旅行，老潇洒个，但是我考上大学个庆祝方式就是和好朋友去吃了一杯赤豆刨冰，侬可能会觉得不能想象，但是阿拉小辰光内心个需求就是搿能简单就觉得满足了，现在个物质极大丰富，到处侪鼓励侬“买买买”，但是大家个内心反而勿容易得到满足了，迭个问题值得阿拉想一想。